NDI-ის სადამკვირვებლო მისია საქართველოშია – 28 ოქტომბრის საპრეზიდენტო არჩევნებს ორგანიზაციის 16 წარმომადგენელი დააკვირდება.
პირველადი შედეგები არჩევნების მეორე დღეს, საგანგებო პრესკონფერენციაზე გახდება ცნობილი, საბოლოო ანგარიში კი სავარაუდოდ, 1 თვის ვადაში გამოქვეყნდება.
ორგანიზაციის რეპორტში მოხვდება ბოლო დროს გავრცელებული ფარული აუდიო ჩანაწერებიც, ასევე პარლამენტის თავმჯდომარის განცხადებები, არასამთავრობო სექტორის მიმართ.
NDI არჩევნებს, მთელი საქართველოს მასშტაბით დააკვირდება.
"მაღალი რანგის დელეგაცია საქართველოში არჩევნების დღეს მიმდინარე მოვლენებს, ასევე ხმების დათვლის პროცესს დააკვირდება. მეორე დღეს ჩვენ განცხადებას პრესკონფერენციაზე გავაკეთებთ, რომელიც არა მხოლოდ არჩევნების დღეს, არამედ მთლიან წინასაარჩევნო კამპანიის პერიოდს შეეხება. მოგვიანებით კი ანალიტიკოსების მუშაობის შედეგებზე დაყრდნობით, დეტალურ ანგარიშს წარვადგენთ. ამ ეტაპზე იმის თქმა შემიძლია, რომ ჩემი შეშფოთების საგანია თავდასხმები სამოქალაქო სექტორზე წინასაარჩევნო კამპანიის პერიოდში. ჩვენ ასევე გვყავს დამკვირვებლები, რომელებიც თვალს ადევნებენ ომეგას და აუდიო ჩანაწერების საქმეს. მოვლენები საარჩევნო კამპანიის დროს განვითარდა. ეს ახლა ზოგადი პოლიტიკური გარემოს ნაწილია და ჩვენს ანგარიშში ამ საკითხსაც შევეხებით,"-განაცხადა NDI-ის საქართველოს ოფისის დირექტორმა ლორა ტორნტონმა.