ქალაქის ტერიტორიაზე, ცენტრალურ ნაწილში მოსიარულე მსხვილფეხა შინაური პირუტყვების შესახებ ქალაქ ზუგდიდის საკრებულოს დღევანდელ სხდომაზე მსჯელობა გაიმართა. საკრებულოს ფრაქცია ერთიანი ნაციონალური მოძრაობის წევრმა ანა წითლიძემ განაცხადა, რომ პრობლემის გადაწყვეტის ალტერნატიული გზების მოსაძიებლად საჭიროა მერიის შესაბამისი სამსახურის წარმომადგენლებთან შეხედრა და მსჯელობა კონკრეტულ გზებზე. დეპუტატის განცხადებით, არ არის გამორიცხული, რომ არსებული რესურსი არასაკმარისია პრობლემის აღმოსაფხვრელად.
აღნიშნულ თემას ტელეკომპანია "ოდიშმა" გასულ თვეს ვრცელი სიუჟეტი მიუძღვნა, სადაც საუბარი იყო ქალაქში მოსიარულე მსხვილფეხა შინაურ ცხოველებზე, მათ შორის ზუგდიდის ბოტანიკურ ბაღში და მის მიმდებარე ტერიტორიაზე.
ქალაქ ზუგდიდის მერიის ზედამხედველობის სამსახურის უფროსის ნუკრი ესართიას განმარტებით, არასწორია ინფორმაცია თითქოს ზედამხედველობის სამსახურს თანამშრომლები არ ჰყოფნის პრობლემის დასაძლევად. მისივე თქმით, ის და მისი სამსახურის თანამშრომლები მზად არიან საკრებულოს მომდევნო სხდომას დაესწრონ და პრობლემის მოგვარების გადაწყვეტაში მიიღონ მონაწილეობა.
ქალაქ ზუგდიდის საკრებულოს თავმჯდომარის მოადგილე გიორგი თოდუა განმარტავს, რომ თუ არ შეიცვალა შინაური ცხოველების მეპატრონეების მიდგომა არსებული პრობლემის მიმართ, მაშინ თვითმმართველობა სანქციების გამკაცრებაზე იფიქრებს.
პრობლემის აღმოსაფხვრელად როგორ გადაწყვეტილებას მიიღებენ შესაბამისი სამსახურები, ჯერჯერობით უცნობია. თუმცა ფაქტია, რომ გამკაცრებული სანქციები მეპატრონეების ფინანსურ მდგომარეობაზე იქონიებს გავლენას.