პრეზიდენტის ინსტიტუტი არ არსებობს, როგორც მართლმსაჯულება არ არსებობს. რომელი საუკუნის ე.წ. დემოკრატიულ ქვეყანაში ვცხოვრობთ ვერ გეტყვით, – ამის შესახებ „ინტერპრესნიუსს“ დეკანოზ გიორგი მამალაძის ადვოკატმა მიხეილ რამიშვილმა განუცხადა, რითაც გამოეხმაურა დეკანოზის შეწყალებაზე უარის თქმას.
მისივე თქმით, საპატრიარქოსა და გარკვეულ საერო პირებს ძალიან არ უნდათ, რომ დეკანოზი გიორგი მამალაძე თავისუფალი იყოს.
„მე დარწმუნებული ვიყავი, რომ აბსოლუტურად ყველაფერს გააკეთებდნენ საპატრიარქო და გარკვეული საერო პირები, რომ მამა გიორგის შეწყალება არ მომხდარიყო. ამას დამოუკიდებლად ვერც პრეზიდენტი გადაწყვეტდა და ვერც კომისიის წევრები. მითუმეტეს, კომისიის ერთ-ერთი წევრია ქორეპისკოპოსი თეოდორე ჭუაძე“, – განაცხადა მიხეილ რამიშვილმა.
მისივე თქმით, შეწყალების კომისიის წევრებს გონიერება აქვთ დაკარგული.
„კეთილსინდისიერება და გონიერება აქვთ დაკარგული. გარკვეული პირების ინტერესები გააჟღერეს და უფრო გაითვალისწინეს, ვიდრე სამართლიანობა. პრეზიდენტზე უკვე აღარ მაქვს ლაპარაკი, რადგან პრეზიდენტიც დამოკიდებულია იმ პირებზე, რომლებიც საპატრიარქოში არიან“, – განაცხადა რამიშვილმა.
ადვოკატის განცხადებით, ე.წ. ციანიდის საქმეში ჩართულები იყვნენ როგორც საერო, ასევე სასულიერო პირები.
„ე.წ. ციანიდის საქმეში საერო და სასულიერო პირების ჩართულობა იყო, ეს არაერთხელ არის გაჟღერებული. ყველაფერს რომ თავი დავანებოთ, არც პრეზიდენტს, არც საპატრიარქოს, არც საპატრიარქოში მყოფ გარკვეულ პირებსა და შეწყალების კომისიის წევრებს ხალხის აზრი არ აინტერესებთ. სრულიად საქართველომ იცის, რომ მამა გიორგი უდანაშაულოა და ყველას პოზიცია იყო, რომ მამა გიორგი პრეზიდენტს უნდა შეეწყალებინა, მაგრამ ისინი მოსახლეობის აზრს არაფრად თვლიან. პრეზიდენტის ინსტიტუტი არ არსებობს, როგორც მართლმსაჯულება არ არსებობს. რომელი საუკუნის ე.წ. დემოკრატიულ ქვეყანაში ვცხოვრობთ ვერ გეტყვით“, – განაცხადა მიხეილ რამიშვილმა.
შეგახსენებთ, რომ შეწყალების კომისიამ მსჯავრდებული დეკანოზის, გიორგი მამალაძის შეწყალებასთან დაკავშირებით პრეზიდენტს დადებითი რეკომენდაცია ვერ მისცა, რაც პრეზიდენტმა გაიზიარა.
შეწყალების კომისიის თავმჯდომარის, ზვიად ქორიძის განცხადებით, კომისიამ დეკანოზ გიორგი მამალაძის საქმე გასულ კვირას განიხილა.