წყალტუბოდან ქუთაისის კლინიკა "მედიქალ სითიში" წუხელ ეტაპობრივად კიდევ 6 ბავშვი გადაიყვანეს. მათ ინტოქსიკაციის სიმპტომები აღენიშნებათ.
კლინიკის ინფექციურ დაავადებათა განყოფილების ხელმძღვანელი ნუგზარ მაღლაკელიძე აცხადებს, რომ ეს ისეთივე სიმპტომებია, რის გამოც წინა დღეებში კლინიკაში 11 ბავშვი მოხვდა.
მისი თქმით, ჯერჯერობით ვარაუდია შიგელოზზე, რაც არის ნაწლავური ინფექცია, რომლის გამომწვევი მიზეზი, შესაძლოა, ბოსტნეული ან რძის ნაწარმი იყოს, თუმცა დაზუსტებით ამ ეტაპზე ვერაფერს ამბობს.
რაც შეეხება წინა დღეებში შეყვანილ 11 ბავშვს, მათგან 4 გაეწერა, 7 კი ამ დრომდე კლინიკაში რჩება.
შეგახსენებთ, რამდენიმე დღის წინ წყალტუბოს მუნიციპალიტეტის საბავშვო ბაღებში, მათ შორის გეგუთის ბაღში 11 ბავშვის მოწამვლის ფაქტი დაფიქსირდა.
