პრემიერის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე აცხადებს, რომ მიღებულია გადაწყვეტილება შვეიცარიულ კომპანიასთან ხელშეკრულების გაფორმების შესახებ.
ამ კომპანიამ უნდა განახორციელოს ტვირთბრუნვის მონიტორინგი რუსეთ-საქართველოს საზღვარზე, ვინაიდან ოკუპირებულ ტერიტორიაზე საქართველოს ამის შესაძლებლობა არა აქვს.
ლაპარაკია ჯერ კიდევ 2011 წელს მიღებული შესაბამისი გადაწყვეტილების რეალიზაციის დაწყებაზე, რომელიც წლებია ჭიანურდება, თუმცა კი ეს იყო ერთერთი მნიშვნელოვანი პირობა, რომელიც საქართველომ წამოაყენა, როცა WTO-ში რუსეთის გაწევრიანებას დასთანხმდა.
აბაშიძე ამბობს, რომ მუშაობა ამ საკითხზე მთელი ეს წლები მიმდინარეობდა და ახლა საქმე მისულია მონიტორინგის დეტალების დაზუსტებამდე, რაც სამუშაო ჯგუფების დეკემბერში დაგეგმილ მორიგ შეხვედრაზე უნდა მოხდეს, საქართველოს მხრიდან საქმეში ახლა უკვე არა აბაშიძე, არამედ ფინანსთა სამინისტროა ჩართული.
შეგახსენებთ, 2011 წელს მიღებული შეთანხმების თანახმად, რუსეთ-საქართველოს საზღვარზე ტვირთბრუნვის მონიტორინგი ნეიტრალურმა შვეიცარიულმა კომპანია SGS-მა უნდა განახორციელოს, რომელთანაც კონტრაქტები როგორც საქართველომ, ისე რუსეთმა უნდა გააფორმოს.