გუშინ მარტვილის რაიონის სოფელ ნახუნაოში მკვლელობა მოხდა. შსს-ს პრესსამსახურის ცნობით, მკვლელობა ჩადენილია ცეცხლსასროლი იარაღით, დაჭრილია აგრეთვე კიდევ ერთი ადამიანი, რომელიც უმძიმეს მდგომარეობაში ქუთაისის საავადმყოფოშია გადაყვანილი. შსს-ში აცხადებენ, რომ დაწყებულია საგამოძიებო მოქმედებები, დამნაშავის ვინაობა დადგენილია, ეს არის შუახნის მამაკაცი,რომელმაც ცეცხლი გაუხსნა ორ თანასოფლელს. უწყებაში მომხდარის მოტივზე ოფიციალურად ჯერჯერობით არ საუბრობენ, თუმცა თვითმხილველები აცხადებენ, რომ სავალალოდ დამთავრებული ეს ინცინდენტი ყოფით ნიადაგზე მოხდა.
როგორც ისინი ყვებიან, მოკლული და დაჭრილი სახლის გადახურვაში ეხმარებოდნენ თანასოფლელს, შემდეგ ვახშამზე მეზობელ ოჯახში გადავიდნენ, სადაც მათსა და სუფრის ერთერთ წევრს შორის შელაპარაკება მოხდა. მცირე ხანში მდგომარეობა თითქოს განიმუხტა და სუფრაც აიშალა, მაგრამ, როგორც აღმოჩნდა, ერთერთი განაწყენებული, რომელმაც სხვაზე ადრე დატოვა იქაურობა, გზაში ჩაუსაფრდა და ცეცხლი გაუხსნა თანასოფლელებს.
მომხდარზე აღიძრა საქმე "სისხლის სამართლის კოდექსის" 108-ე მუხლით, რაც განზრახ მკვლელობას გულისხმობს.