საქართველოს მთავრობის გადაწყვეტილებით,  2016 წლის აპრილში მასწავლებლის საშუალო ხელფასი უკვე 600-700 ლარი იქნება. ამის შესახებ მთავრობის დღევანდელ სხდომაზე  განათლების მინისტრმა, თამარ სანიკიძემ განახცადა. 
ამასთან, როგორც პრემიერ-მინისტრმა ირაკლი ღარიბაშვილმა აღნიშნა,  ჯანდაცვის შემდეგ ყველაზე დიდი ფინასური რესურსი მობილიზებული იქნება განათლებაზე. 
ირაკლი ღარიბაშვილის თქმით, 2015 წლის 1 აპრილიდან პედაგოგების ხელფასების ზრდის მეორე ეტაპი დაიწყო და გახდა 405 ლარი, ეს გაგრძელდება გაისადაც. განათლების და მეცნიერების მინისტრმა თამარ სანიკიძემ კი აღნიშნა, რომ 2012 წელთან შედარებით 60%-იანი ზრდა არის საბაზო ხელფასის. 
"მაგრამ არ დაგვავიწყდეს, რომ საბაზო ხელფასის ზრდა უფრო მეტად ზრდის კიდევ საშუალო ხელფასს. მასწავლებლის საშუალო ხელფასი უკვე 2016 წლის აპრილში გვექნება 600-700 ლარი", – განაცხადა თამარ სანიკიძემ. 
პრემიერი დაინტერესდა,  რამდენი იყო საშუალო ხელფასი, რაზეც განათლების მინისტრმა, თაამარ სანიკიძემ უპასუხა, რომ საშუალო ხელფასი იყო 400-დან 500 ლარამდე. როგორც სანიკიძემ აღნიშნა, 2017 წელს კიდევ არის მასწავლებლის ხელფასის ზრდა დაგეგმილი, რომელიც საბოლოო ჯამში საქართველოში არსებულ საშუალო ხელფასს გაუტოლებს მასწავლებლის ხელფასსაც. 
პრემიერ-მინისტრმა ირაკლი ღარიბაშვილმა ისაუბრა მეცნიერების ხელფასებზეც. მისი თქმით, ეს ხელფასები იყო მიზერული, სადღაც 150-200 ლარი და გაიზარდა 200-300%-ით. ამ თემაზე საუბრისასა განათლების მინისტრმა აღნიშნა, რომ კვლევით დაწესებულებებში საშუალო ხელფასი არის 600-700 ლარი, ადრე კი 150-200 ლარი იყო.