თურქეთის მოიერიშეებმა თურქეთ-სირიის საზღვართან, სირიის პროვინცია ლათაკიის მახლობლად რუსული გამანადგურებელი თვითმფრინავი სუ 24 ჩამოაგდეს. თურქეთის მხარე აცხადებს, რომ თვითმფრინავი ჩამოგდებულ იქნა მას შემდეგ, რაც მან თურქეთის საჰაერო სივრცე დაარღვია და გაფრთხილებაზე რეაგირება არ მოახდინა. .ზოგიერთი ცნობით, პილოტებმა კატაპულტირება და გადარჩენა მოახერხეს, სხვა წყაროების თანახმად კი, ერთი მათგანი დაიღუპა, ხოლო მეორე ტყვედ იქნა აყვანილი სირიელი მებრძოლების მიერ. თურქეთის პრემიერ მინისტრმა აჰმედ დავუთოღლუმ სირიასთან განვითარებული ამ და სხვა წინამორბედი მოვლენების გამო ნატოსა და გაეროსთან საგანგებო კონსულტაციები მოითხოვა.
რუსეთის თავდაცვის სამინისტრო მოიერიშის ჩამოგდების ფაქტს ადასტურებს, თუმცა უარყოფს, რომ მან თურქეთის საჰაერო სივრცე დაარღვია.– ამის სესახებ განცხადება ვლადიმერ პუტინის პრესმდივანმა დიმიტრი პესკოვმა გააკეთა.
პესკოვმა კომენტარი არ გააკეთა თურქეთში საგარეო საქმეთა მინისტრის სერგეი ლავროვის ვიზიტის შესაძლო გაუქმების შესახებ.
რუსეთის სათათბიროს დეპუტატების ნაწილი პრეზიდენტ ვლადიმერ პუტინს მოუწოდებენ გაწყვიტოს დიპლომატიური ურთიერთობა თურქეთთან, გამოიწვიოს ელჩი თურქეთიდან და შეწყდეს ფრენები ამ ქვეყნის მიმართულებით. ამის შესახებ გაზეთი ,,იზვესტია'' წერს.
გამოცემის ცნობით, რუსული ბომბდამშენის ჩამოგდების გამო რუსეთის პრეზიდენტს თურქეთთან პროტესტის ნიშნად დიპლომატიური ურთიერთობების გაწყვეტა კომუნისტური პარტიის წევრებმა მოსთხოვეს და წერილის ასლი რუსეთის საგარეო საქმეთა მინისტრს სერგეი ლავროვს გაუგზავნეს.