ბერა ივანიშვილი TV პირველსა და ფორმულას ცილისწამების ბრალდებით სასამართლოში უჩივის. საჩივარი სასამართლოში მისმა ადვოკატმა, დავით ასათიანმა უკვე შეიტანა. მან მედიასთან კომენტარიც გააკეთა.
“ბერა ივანიშვილის სარჩელი თბილისის საქალაქო სასამართლოში შევიდა – ცილისმწამებლური, დიფამაციური ფაქტების წინააღმდეგ. სარჩელის მოპასუხეები არიან TV პირველი და ფორმულა. სარჩელი ეხება იმ ფაქტების გავრცელებას, რომელიც სიცრუეზე დაფუძნებულია, მას რეალობასთან არანაირი კავშირი არ აქვს. მოსარჩელე ითხოვს ამ ფაქტების შესაბამისი ფორმით უარყოფას და მის ცილისწამებად გამოცხადებას […]
მთლიანად სიუჟეტი ვრცელია, მაგრამ ჩვენ გვაქვს რამდენიმე ფაქტი, რომელიც გავრცელდა გადამოწმების, ჟურნალისტური გულისხმიერებისა და მსგავსი საფუძვლების გარეშე და პირდაპირ ეხება დანაშაულის დაბრალებას – კრიმინალურ გარჩევებთან ბერა ივანიშვილის რაღაც ჰიპოთეტურ კავშირს და ა.შ. სარჩელის დეტალებს საზოგადოებას მოგვიანებით გავაცნობთ”. – თქვა ბერას ადვოკატმა.
ცნობისთვის, 30 სექტემბერს ბერა ივანიშვილმა განცხადება გაავრცელა, სადაც წერს: “მივმართე ძალიან მაღალი კომპეტენციის მქონე ადვოკატს, საკუთარი საქმის ნამდვილ პროფესიონალს, დავით ასათიანს, რომლის დახმარებითაც, ჩემ მიმართ გაჟღერებულ თითოეულ ბინძურ ცილისმწამებლურ ბრალდებასთან დაკავშირებით სამართლებრივ პასუხს მოვითხოვ.
მინდა შეგახსენოთ, რომ ბოლო პერიოდში კონკრეტული მედიასაშუალებები და ასევე კონკრეტული პირები აქტიურად ტირაჟირებენ, თითქოს ე.წ. “ქოლცენტრებს” ვმფარველობ, რიგ ადამიანებს ჩემი მითითებებით აპატიმრებენ, შევდივარ უკანონო გარიგებებში და ა.შ. მსგავს საკითხებზე მხოლოდ კითხვის დასმაც კი საკმარისია, რომ ცილისწამების მცდელობის აშკარა ნიშნები გამოიკვეთოს, თუმცა, ზემოთ აღნიშნული სუბიექტები უფრო შორს მიდიან და ინფორმაციას ჩემი ვითომდა დანაშაულებრივი საქმიანობის შესახებ მტკიცებით ფორმაში ავრცელებენ ისე, რომ ამ აბსურდის დასადასტურებლად ერთი ფაქტიც არავის წარმოუდგენია”.