4 ოქტომბრის აქციის საქმეზე დაკავებული ოპოზიციონერი პოლიტიკოსი ირაკლი ნადირაძე საპატიმროდან მორიგ მიმართვას ავრცელებს. ნადირაძე განმარტავს, რომ იგი არანაირი საპროცესო შეთანხმების გაფორმებასა თუ შეწყალების მოთხოვნას არ აპირებს.
„ჩემი პოზიცია ამ საკითხთან დაკავშირებით ისედაც იცით, მაგრამ კიდევ ერთხელ დავწერ: ივანიშვილის რუსულ, ავტოკრატიულ რეჟიმთან არც საპროცესო შეთანხმებას და არც შეწყალების თხოვნას არათუ არ ვაპირებ, არც კი განვიხილავ! არც ერთი ნაბიჯი უკან და ბრძოლა ბოლომდე! უსამართლოდ მოსჯილი 7 წლიდან ერთი უკვე გავიდა და დარჩენილ ექვს წელშიც, როგორც შემიძლია და შემეძლება ოთხ კედელში გამოკეტილ ადამიანს, ბოლომდე გავაგრძელებ ბრძოლას თქვენთან ერთად ჩვენი ქვეყნის ღირსებისთვის, თავისუფლებისთვის და ევროპული მომავლისთვის!“ — აღნიშნულია ირაკლი ნადირაძის განცხადებაში.
შეგახსენებთ, რომ 2025 წლის 4 ოქტომბრის აქციის დასრულებისთანავე, სამართალდამცველებმა შეკრების საორგანიზაციო კომიტეტის ხუთივე წევრი — პაატა ბურჭულაძე, მურთაზ ზოდელავა, ირაკლი ნადირაძე, პაატა მანჯგალაძე და ვაჟა ბერიძე დააკავეს.
მომდევნო ორი კვირის განმავლობაში, სამართალდამცველებმა ქვეყნის მასშტაბით აქციის სულ 57 მონაწილე აიყვანეს, რომელთაგან სასამართლომ აღკვეთის ღონისძიების სახით პატიმრობა 54 პირს შეუფარდა, ხოლო სამს — გირაო.
ამავე საქმის ფარგლებში, განსაკუთრებულ დავალებათა დეპარტამენტის (გდდ) ყოფილი თანამშრომლის, ირაკლი შაიშმელაშვილის მიმართ ძებნა გამოცხადდა კონსტიტუციური წყობილების ძალადობით შეცვლისკენ და სახელმწიფო ხელისუფლების დამხობისკენ მოწოდების ბრალდებით. დეკემბრის თვეში კი 4 ოქტომბრის აქციის ორგანიზების ბრალდებით ასევე დაკავებულ იქნა თავდაცვის ყოფილი მინისტრი ბაჩო ახალაია.