კულტურის მინისტრს, მიხეილ გიორგაძეს საყდრისის დაცვის კომიტეტის წევრებმა ლიბერალიზმის სასწავლო ცენტრში ლექციის ჩატარების საშუალება არ მისცეს. მათ ლექციაზე გაშალეს ბანერები და მინისტრს წაუყენეს მოთხოვნა ესაუბრა საყდრისი-ყაჩაღიანზე და განუცხადეს, რომ წინააღმდეგ შემთხვევაში საჯარო ლექციას ჩაშლიდნენ.
"ამჟამინდელ მინისტრს ნამდვილად არ აქვს მორალური უფლება ილაპარაკოს ქართულ კულტურაზე, მას შემდეგ რაც მან ხელი მოაწერა კულტურული მემკვიდრეობის ძეგლის – საყდრისის აფეთქებას. ჩვენ ამაოდ ვცდილობდით რამდენიმე ადგილას შევხვედროდით მას, თუმცა ის ყოველთვის გაგვირბის ხოლმე. ამიტომ ვისარგებლეთ შემთხვევით, მოვედით აქ და კიდევ ერთხელ გამოვხატეთ პროტესტი საყდრისის აფეთქების მიმართ" – განაცხადა კომიტეტის წევრმა ნინო ბურჭულაძემ.
მიხეილ გიორგაძის თქმით კი, ლექციის ფორმატი შეიცვალა დამსწრე საზოგადოების ინტერესის მიხედვით და პრაქტიკულად, მთელი შეხვედრა საყდრისი-ყაჩაღიანის თემაზე საუბარს მიეძღვნა.