ვინ იყო იგორ ერუსალიმოვი და რატომ უკავშირებენ მის სიკვდილს მოსკოვის რესტორან Balzi Rossi-ზე მოწყობილ ტერაქტს
1 აგვისტოს საღამოს მოსკოვის ცენტრში, კუდრინის მოედანზე მდებარე ელიტურ იტალიურ რესტორან Balzi Rossi-სთან აფეთქება მოხდა. რესტორანი იმ დღეს ჩვეულებრივი სტუმრებისთვის დაკეტილი იყო — შიგნით კერძო ბანკეტი მიმდინარეობდა.
რუსული მედიის ცნობით, უცნობმა ქალმა რესტორანში საჩუქრის ყუთის შეტანა სცადა. ქალი, სავარაუდოდ, კურიერი იყო და შესაძლოა არც სცოდნოდა, რა იდო შეფუთვაში. შესასვლელთან იგი დაცვის თანამშრომელმა გააჩერა, რის შემდეგაც თვითნაკეთი ასაფეთქებელი მოწყობილობა ამოქმედდა.
თავდაპირველად სამი ადამიანის დაღუპვის შესახებ გავრცელდა ინფორმაცია, მოგვიანებით მსხვერპლის რაოდენობა ხუთამდე გაიზარდა. დაშავდა, სულ მცირე, 19 ადამიანი.
რუსული Telegram-არხების ინფორმაციით, რესტორანში რუსეთის საჰაერო-კოსმოსური ძალების მთავარსარდლის, გენერალ-პოლკოვნიკ ალექსანდრ ჩაიკოს 55 წლის იუბილესა და მის ახალ თანამდებობაზე დანიშვნას აღნიშნავდნენ. თავად ჩაიკო აფეთქებას გადაურჩა. სახელმწიფო ბაზებით დადასტურდა მისი 27 წლის სიძის, დანიილ პერედრის დაღუპვა. გავრცელებული ინფორმაციით, დაიჭრა ჩაიკოს ქალიშვილიც.
რუსეთის ხელისუფლებას არც ბანკეტის სტუმრების სრული სია და არც დაღუპულთა ვინაობა გამოუქვეყნებია.
ორი წინასწარ მომზადებული საფლავი
აფეთქებიდან ორი დღის შემდეგ Telegram-არხმა „ВЧК-ОГПУ“ მოსკოვის ტროეკუროვის სასაფლაოს ძალოვანი სტრუქტურების წარმომადგენლებისთვის განკუთვნილი მონაკვეთიდან ვიდეო გამოაქვეყნა.
კადრებში ორი ახლად გათხრილი საფლავი ჩანდა. სასაფლაოს მუშები ამბობდნენ, რომ ერთ-ერთი მათგანი „გენერლისთვის“ მზადდებოდა, თუმცა მის ვინაობას არ ასახელებდნენ. ეს ადგილი უშუალოდ ესაზღვრება სასაფლაოს იმ მონაკვეთს, სადაც რუსეთის უშიშროების ფედერალური სამსახურის, თავდაცვის სამინისტროსა და ფედერალური დაცვის სამსახურის მაღალი თანამდებობის პირებს კრძალავენ.
5 აგვისტოს იმავე სასაფლაოზე განსაკუთრებული უსაფრთხოების ზომები ამოქმედდა. დილიდან ადგილზე იმყოფებოდნენ ფედერალური დაცვის სამსახურის თანამშრომლები, როსგვარდიის რამდენიმე ავტობუსი და სამოქალაქო ტანსაცმელში ჩაცმული პირები. მიმდებარე ტერიტორიაზე პარკირება აკრძალეს, სასაფლაოზე შემსვლელ ავტომობილებს ამოწმებდნენ, ადამიანებს კი სპეციალურ ჩარჩოში ატარებდნენ.
სამგლოვიარო პროცესია საჰაერო-კოსმოსური ძალების დროშით საპატიო ყარაულმა გააცილა, უშუალოდ საფლავთან კი სახმელეთო ჯარების დროშა იდგა. თვითმხილველები ამბობდნენ, რომ კრძალავდნენ „შედარებით ახალგაზრდა გენერალს“, რომელიც ალექსანდრ ჩაიკოსთან მეგობრობდა და შესაძლოა მის იუბილეზე იმყოფებოდა.
სახელი, რომელიც რაიონულ ჩატში გამოჩნდა
იმავე დღეს უკრაინელმა OSINT-ანალიტიკოსმა Necro Mancer-მა მოსკოვის სოლნცევოს რაიონულ ჩატში გამოქვეყნებული სამგლოვიარო განცხადება იპოვა.
განცხადებაში ეწერა, რომ 4 აგვისტოს ოჯახი, ახლობლები და თანამებრძოლები ემშვიდობებოდნენ „სპეციალური სამხედრო ოპერაციის გმირს“, 53 წლის გენერალ-ლეიტენანტ იგორ ფელიქსის ძე ერუსალიმოვს. მითითებული მისამართი ემთხვეოდა მონაცემთა გაჟონილ ბაზებში დაფიქსირებულ მის საცხოვრებელ ადგილს. დაკრძალვა 5 აგვისტოს დილით იყო დანიშნული.
ამის შემდეგ „Медиазона“, „Важные истории“, ASTRA და სხვა რუსულენოვანი გამოცემები დაინტერესდნენ, ხომ არ იყო ერუსალიმოვი სწორედ ის გენერალი, რომელიც Balzi Rossi-სთან აფეთქების შემდეგ განსაკუთრებული გასაიდუმლოებით დაკრძალეს.
ვინ იყო იგორ ერუსალიმოვი
იგორ ერუსალიმოვი რუსეთის არმიაში შტაბის მაღალი რანგის ოფიცერი იყო.
2020 წელს, ჯერ კიდევ პოლკოვნიკის წოდებით, იგი რუსეთის დასავლეთის სამხედრო ოლქის შტაბის ოპერატიული სამმართველოს უფროსის თანამდებობას იკავებდა. ეს არის სტრუქტურა, რომელიც სამხედრო ოპერაციების დაგეგმვას, ჯარების კოორდინაციასა და შტაბის ოპერატიულ მუშაობას უზრუნველყოფს.
2024 წელს ერუსალიმოვი რუსეთის საჯარო რეესტრის ერთ-ერთ დოკუმენტში უკვე მოსკოვის სამხედრო ოლქის შტაბის უფროსის პირველ მოადგილედ და ოპერატიული სამმართველოს უფროსად იყო მოხსენიებული.
გენერალ-მაიორის წოდება მან 2022 წლის თებერვალში, უკრაინაში რუსეთის სრულმასშტაბიან შეჭრამდე ერთი კვირით ადრე მიიღო. 2025 წლის მაისში კი ვლადიმირ პუტინმა ერუსალიმოვს გენერალ-ლეიტენანტის წოდება მიანიჭა.
მისი კონკრეტული როლი უკრაინის წინააღმდეგ მიმდინარე ომში საჯაროდ დეტალურად აღწერილი არ არის, თუმცა დაკავებული თანამდებობებიდან ჩანს, რომ იგი რუსეთის დასავლეთის მიმართულებით სამხედრო ოპერაციების დაგეგმვაში ჩართული ერთ-ერთი მაღალი რანგის შტაბის ოფიცერი იყო.
დადასტურებული სიკვდილი და დაუდასტურებელი მიზეზი
ერუსალიმოვის გარდაცვალება და დაკრძალვა პრაქტიკულად დადასტურებულია, თუმცა რუსეთის თავდაცვის სამინისტროს მისი სიკვდილის შესახებ ოფიციალური განცხადება არ გაუვრცელებია.
ოფიციალურად უცნობია გარდაცვალების თარიღიც და მიზეზიც. ბოლომდე დადასტურებული არ არის მისი მეგობრობა ალექსანდრ ჩაიკოსთან და არც ის, იმყოფებოდა თუ არა იგი 1 აგვისტოს Balzi Rossi-ში.
არსებობს კიდევ ერთი შეუსაბამობა: ტროეკუროვის სასაფლაოზე მყოფი თვითმხილველები და „ВЧК-ОГПУ“ თავდაპირველად „გენერალ-მაიორის“ დაკრძალვაზე წერდნენ, ერუსალიმოვი კი 2025 წლიდან გენერალ-ლეიტენანტი იყო. ეს შეიძლება თვითმხილველთა შეცდომა იყოს, თუმცა არც ის გამოირიცხება, რომ იმ დღეს სასაფლაოზე ორ სხვადასხვა მაღალჩინოსან სამხედრო პირს კრძალავდნენ.
ამ დროისთვის ყველაზე ზუსტი ფორმულირება ასეთია: 53 წლის გენერალ-ლეიტენანტი იგორ ერუსალიმოვი გარდაიცვალა და 5 აგვისტოს მოსკოვში დაკრძალეს. რუსული დამოუკიდებელი მედია და Telegram-არხები მის სიკვდილს Balzi Rossi-სთან მომხდარ აფეთქებას უკავშირებენ, თუმცა ამის ოფიციალური დადასტურება ჯერ არ არსებობს.
გენერლის სიკვდილი დამალული ვეღარ დარჩა. საიდუმლოდ რჩება მხოლოდ ის, სად და როგორ დაიღუპა იგი.