ტერორისტების მიერ ბომაკოს სასტუმრო Radisson-ში მძევლად აყვანილების გათავისუფლების ოპერაცია წარმატებით დასრულდა.  6 საათიანი ოპერაციის შემდეგ სამართალდამცველებმა ყველა იმ ადამიანის გათავისუფლება შეძლეს, ვინც ტერორისტების ტყვეობაში აღმოჩნდა.

სპეცოპერაციაში მალელ სამართალდამცველებთან ერთად გაეროს მშვიდობისმყოფელები და ამერიკელი სამხედროებიც იყვნენ ჩართულნი. ცოცხალი ძალა ბამაკოში მალის მთავარმა მოკავშირემ, საფრანგეთმაც გაგზავნა.

შენობაში შესულ ძალოვანებს 6 მძევალი მძიმედ დაჭრილი დახვდათ. ყველა მათგანი ბამაკოს საავადმყოფოშია გადაყვანილი. არის მსხვერპლიც, თუმცა დაღუპულების შესახებ დაზუსტებული ინფორმაცია ჯერ ჯერობით არ ვრცელდება. არსებული მონაცემებით ტერაქტის შედეგად 27 ადამიანია დაღუპული.

შტურმის დროს სამართალდამცველებმა ყველა თავდამსხმელი მოკლეს, თუმცა კონკრეტულად რამდენი ტერორისტი მოქმედებდა სასტუმროში ჯერ ჯერობით არ კონკრეტდება.

ტერაქტზე პასუხისმგებლობა ალ–ქაიდას ლოიალურმა დაჯგუფებამ "ალ მურაბიტუნმა " აიღო.

შეგახსენებთ,  შეიარაღებული ტერორისტები სასტუმროში გუშინ დილის ექვს საათზე შეიჭრნენ და ცეცხლი გახსნეს. მათ რამდენიმე ადამიანი მოკლეს, რის შემდეგაც შენობის მეშვიდე სართული დაიკავეს. ტერორისტებმა მძევლად აიყვანეს სასტუმროს 30–მდე თანამშრომელი და 140 სტუმარი, რომელთა შორის უმეტესობა უცხოელი ტურისტები იყვნენ, .

პირველი გასროლიდან 20 წუთში სასტუმრო სპეცრაზმის ალყაში იყო. ინფორმაციას შენობაში არსებულ ვითარებაზე ძალოვანები მძევლებისგან იღებდნენ, რის შემდეგაც უკვე შენობის შტურმი დაიწყეს.