რუსეთის საგარეო საქმეთა სამინისტროს სპიკერის, მარია ზახაროვას თქმით, რუსეთი “იძულებული იქნება” საქართველო არამეგობრული ქვეყნების სიაში შეიყვანოს, თუ ის ევროკავშირში გაწევრიანდება.
ზახაროვა ამბობს, რომ საქართველოს ამ სიაში მოხვედრა მასზე “შესაბამისი ეკონომიკური ზომების” გავრცელებასაც გულისხმობს.
“არ ვამბობ, რომ ეს გვინდა, მაგრამ ევროკავშირის ახალი მოთხოვნების გათვალისწინებით, რუსეთს მოუწევდა საქართველოს არამეგობრული რეჟიმების მქონე ქვეყნების სიაში შეყვანა და საპასუხო ეკონომიკური ზომების მასზე გავრცელება – ეს გულისხმობს საპასუხო ზომების მიღებას საქართველოდან რუსეთში შეტანილი მინერალური წყლის, ხილის, ღვინისა და ყველანაირი პროდუქტის მწარმოებლების მიმართ”. – თქვა ზახაროვამ.
ზახაროვამ ასევე აღნიშნა, რომ რუსეთს ბოლომდე არ ესმის, როგორ შეიძლება საქართველოს სურდეს ისეთ გაერთიანებაში გაწევრიანება, რომელიც მათ “უსამართლოდ ექცევა და აშანტაჟებს”.
“რუსულ მხარეს ბოლომდე არ ესმის, თუ როგორ შეიძლება თბილისი მიისწრაფვოდეს ისეთ კავშირში გაწევრიანებისკენ, რომლის წევრები საქართველოს წინააღმდეგ უმიზეზოდ აწესებენ სანქციებს, რითიც მას ახალი ანტირუსული სამხედრო ავანტიურისკენ უბიძგებენ; თითქმის ღიად უჭერენ მხარს საქართველოში სახელმწიფო გადატრიალების ორგანიზების მცდელობებს და ქართველ ხალხს თავს ახვევენ მათთვის მიუღებელ ღირებულებებს და მათ აიძულებენ, მათ შორის ფინანსური და ეკონომიკური ბერკეტების გამოყენებით, უარი თქვან საკუთარ კულტურასა და იდენტობაზე”. – ამბობს ზახაროვა.
ზახაროვას თქმით, გაწევრიანების შემთხვევაში, ევროკავშირი საქართველოს რუსეთისთვის სანქციების დაწესებას მოსთხოვს, რაც მისივე განცხადებით, “მძიმე დარტყმას მიაყენებს” ტურისტულ ინდუსტრიას და სავაჭრო ურთიერთობებს.