დიდი შვიდეულის (G7) წევრი ქვეყნების საგარეო საქმეთა მინისტრებმა ირანში მიმდინარე მოვლენების შესახებ ერთობლივი განცხადება გაავრცელეს.
განცხადებაში მინისტრები აღნიშნავენ, რომ შეშფოთებული არიან დემონსტრაციების ირგვლივ განვითარებული მოვლენებით და მკაცრად ეწინააღმდეგებიან ირანის რეჟიმის მხრიდან სასტიკი რეპრესიების გაძლიერებას.
“ღრმად შეშფოთებულები ვართ გარდაცვლილთა და დაშავებულთა მაღალი რაოდენობით. ვგმობთ ძალადობის გამიზნულად გამოყენებას და მომიტინგეების მკვლელობას, ასევე, დაკავებებს და უსაფრთხოების ძალების მიერ დემონსტრანტების წინააღმდეგ დაშინების ტაქტიკას”. – წერია განცხადებაში.
G7-ის წევრი ქვეყნების საგარეო საქმეთა მინისტრებმა ირანის ხელისუფლებას მოუწოდეს თავი შეიკავოს ძალადობისგან და პატივი სცეს ირანის მოქალაქეთა უფლებებსა და ფუნდამენტურ თავისუფლებებს.
“G7-ის წევრები მზად არიან, დააწესონ დამატებითი შემზღუდავი ზომები, თუ ირანი განაგრძობს პროტესტისა და განსხვავებული აზრის ჩახშობას ადამიანის უფლებების საერთაშორისო ვალდებულებების დარღვევით”. – აღნიშნულია განცხადებაში.