უკრაინული დელეგაციის ხელმძღვანელმა და უკრაინის ეროვნული უშიშროებისა და თავდაცვის საბჭოს მდივანმა, რუსტემ უმეროვმა და ტრამპის სპეციალურმა წარმომადგენელმა, სტივ უიტკფომა ფლორიდაში აშშ-უკრაინის მოლაპარაკებების შემდეგ განცხადებები გაავრცელეს, რომლის თანახმადაც მხარეებმა “პროდუქტიული და კონსტრუქციული შეხვედრების სერია გამართეს”.
განცხადების მიხედვით, ყურადღება შემდეგი ნაბიჯების ვადების განსაზღვრას, 20-პუნქტიანი გეგმის შემუშავებასა და უსაფრთხოების გარანტიების ჩარჩო ხელშეკრულებას დაეთმო.
ამის შესახებ განცხადება უიტკოფმა და უმეროვმა X-ზე გამოაქვეყნეს.
“ფლორიდაში გასული სამი დღის განმავლობაში უკრაინის დელეგაციამ ამერიკულ და ევროპულ მხარეებთან პროდუქტიული და კონსტრუქციული შეხვედრების სერია გამართა.
უკრაინულ დელეგაციაში შედიოდნენ უკრაინის ეროვნული უშიშროებისა და თავდაცვის საბჭოს მდივანი, რუსტემ უმეროვი და უკრაინის შეიარაღებული ძალების გენშტაბის უფროსი, გენერალ-ლეიტენანტი ანდრიი ჰნატოვი.
ამერიკულ დელეგაციაში შედიოდნენ სპეციალური წარმომადგენელი სტივ უიტკოფი, ჯარედ კუშნერი და თეთრი სახლის პერსონალის წარმომადგენელი, ჯოშ გრუენბაუმი.
უკრაინას, აშშ-სა და ევროპას შორის ერთობლივ სტრატეგიულ მიდგომაზე შესათანხმებლად დისკუსიაში ევროპის ქვეყნების ეროვნული უსაფრთხოების მნიშვნელოვანი მრჩევლებიც მონაწილეობდნენ.
აშშ-უკრაინის ფორმატში ცალკეული კონსტრუქციული შეხვედრაც შედგა, რომელზეც ყურადღება ოთხ მთავარ დოკუმენტს დაეთმო: 20-პუნქტიანი გეგმის შემუშავების გაგრძელებას, უსაფრთხოების გარანტიების მრავალმხრიან ჩარჩო ხელშეკრულებაზე პოზიციების შეთანხმებას, აშშ-ს მხრიდან უსაფრთხოების გარანტიების შეთანხმებაზე პოზიციების შეთანხმებას და ეკონომიკური და კეთილდღეობის გეგმის შემუშავების გაგრძელებას.
განსაკუთრებული ყურადღება დაეთმო ვადებისა და შემდეგი ნაბიჯების რიგითობის განსაზღვრას.
უკრაინა სამართლიანი და გრძელვადიანი მშვიდობის ერთგულია.
ჩვენთვის საერთო პრიორიტეტია მკვლელობის შეჩერება, გარანტირებული უსაფრთხოების უზრუნველყოფა და უკრაინის აღდგენის, სტაბილურობისა და გრძელვადიანი კეთილდღეობის პირობების შექმნა.
მშვიდობა უნდა იყოს არა მხოლოდ ცეცხლის შეწყვეტა, არამედ სტაბილური მომავლის ღირსეული საფუძველი.
უკრაინა დიდად აფასებს აშშ-ს ლიდერობასა და მხარდაჭერას, ასევე ამ მნიშვნელოვანი სამუშაოს მომდევნო ეტაპებზე პარტნიორებთან უწყვეტ მჭიდრო თანამშრომლობას”. – წერია განცხადებაში.