აფხაზეთიდან დევნილი 71 აზა (მადლენა) ჩილაჩავას წინააღმდეგ შსს-მ სასამართლოს მიმართა. აქციების აქტიური მონაწილის, სავარაუდოდ, პირბადის ტარებს ედავებიან.

გაგრის მკვიდრს “ქართული ოცნების” მიერ მიღებული კანონით, 15-დღემდე პატიმრობა ან ჯარიმა ემუქრება.

აზა ჩილაჩავა სასამართლოში არ იმყოფება, რადგან როგორც აქციების მონაწილე ამბობს, მას ოქმი რამდენიმე საათის წინ მიუტანეს. პენსიონერს სურს პროცესს დაესწროს, ამიტომ იმედი აქვს, რომ სხდომა გადაიდება.

“არ მეშინია, არ ვარ ქოცი”- ასე პასუხობს მოსალოდნელ სასჯელს თავად აზა ჩილაჩავა. აზა (მადლენა) ჩილაჩავას ისტორია აქციის მონაწილეებმა კარგად იციან, ქალი 7 წლის შვილთან ერთად აფხაზეთში დარჩა და ქართველ ჯარისკაცებს უვლიდა.

წამიყვანონ და დამიჭირონ, არ მეშინია. მე ყოველთვის ვიტყვი: რუსეთი ოკუპანტია! მე აქციაზე ყოველ დღე ვივლი. ერთი წლის განმავლობაში, აქციაზე პირბადის გარეშე დავდიოდი. გრიპი რომ შემეყარა და ავტობუსში ხველება დავიწყე, ყველა მე მიყურებდა, არავის უნდა, ვირუსი გადაედოს. მომერიდა და პირბადე ამიტომ გავიკეთე.

პროტესტი მაქვს, ამიტომ ვერ გავჩერდები – მომკლან, დამასამარონ, ვერ გამაჩერებენ. მე “ქოცი” არ ვარ! ქოცი, რომ ვიყო, შეიძლება დღეს 4 ბინა მქონოდა” – თქვა აფხაზეთიდან დევნილმა პენსიონერმა.