4 ოქტომბრის აქციის ფარგლებში დაკავებული სამოქალაქო აქტივისტი, ნანა სანდერსი ამბობს, რომ მას დაკავებამდე დაჭერით და მოკვლით ემუქრებოდნენ. ეს ინფორმაცია გამოიტანა ზაჰესის იზოლატორიდან უფლებადამცველმა, რომელმაც მისი დაცვის ქვეშ მყოფი მოინახულა.
ადვოკატი აიჰან გასანოვი ამბობს, რომ როგორც დაკავებული უთითებს, მუქარას ადგილი ჰქონდა სატელეფონო ზარის მეშვეობით მანამდეც, სანამ ის საქართველოში ჩამოვიდოდა და მას შემდეგ, რაც სამშობლოში დაბრუნდა.
სანდერსი გერმანიიდან საქართველოში პირველ ოქტომბერს სპეციალურად აქციაზე დასასწრებლად ჩამოვიდა.
ვერაფერს ვერ უკავშირებს დაკავებას, მისთვის ძალიან მოულოცნელია და არალოგიკურად ჩანს ჯგუფური ძალადობა, ქალბატონმა თქვა, რომ მანამდე იყო მის მიმართ მუქარა. საქართველოში რომ ჩამოვიდა გრძელდებაოდა მის მიმართ მუქარა, იყო ზარი, რა დროსაც ეუბნებოდნენ, რომ დაიჭერდნენ, მოკლავდნენ. ასევე უთხრეს, მსგავი საქმეები სუიციდით სრულდებაო. ვინ ემუქრებოდა არ იცის, თუმცა მუქარის შინაარსი იყო, რომ დაიჭერდნენ. ტელეფონზე ზარით დაუკავშირდნენ”, – აცხადებს ადვოკატი აიჰან გასანოვი.
სანდერსის ოჯახის წევრი კი ამბობს, რომ საერთოდ არ იცოდნენ, თუ სამოქალაქო აქტივისტი საქართველოში იმყოფებოდა, ეს მხოლოდ მას შემდეგ გაიგეს, რა გუშინ ღამით გამომძიებელი დაუკავშირდათ და სანდერსის დაკავების შესახებ აცნობათ.
საერთოდ არ ვიცოდი, რომ საქართველოში იყო ჩამოსული, წუხელ სადღაც ღამის პირველ საათზე დეიდაჩემს დაურეკა გამომძიებელმა უთრა, რომ დაკავებულია თქვენი შვილიო და წამოვედით, რაიონიდან ჩამოვიყვანე ახლახანს. მივედით გულუას 8-ში, გამომძიებელს რომ ვესაუბრე, მითხრა, რომ ზაჰესის იზოლატორშია გადაყვანილიო. გერმანიაშია კი ზოგადად და შეიძლება აქციებისთვის ჩამოვიდა, არვიცი. ცოტა აქტიური კი იყო მაგ მხრივ, დედასთან ჰქონდა კომუნიკაცია და მოელოდა ამ თვეში, მაგრამ უკვე ჩამოსული თუ იყო, ეს ზუსტად არ ვიცოდით. როგორ მოვიქცეთ არ ვიცით. ისიც არ ვიცით, ბრალს რაში დებენ”, – განაცხადა ოჯახის წევრმა.
დაკავებულ ნანა სანდერსს ბრალს, სავარაუდოდ დღეს ან ხვალ წარუდგენენ.
ცნობისთვის, 4 ოქტომბრის მოვლენებთან დაკავშირებით მიმდინარე გამოძიების ფარგლებში სულ 23 ადამიანი დააკავეს. სამს კი ეძებენ.
4 ოქტომბერსვე დააკავეს აქციის საორგანიზაციო კომიტეტის ხუთი წევრი:
პაატა ბურჭულაძე,
მურთაზ ზოდელავა,
პაატა მანჯგალაძე,
ირაკლი ნადირაძე
ლაშა ბერიძე.
6 ოქტომბერს ხელბორკილები აქციის 13 მონაწილეს დაადეს. გუშინ, 7 ოქტომბერს კი კიდევ 5 პირი იქნა დაკავებული.
4 ოქტომბრის მოვლენებთან დაკავშირებით გამოძიება სისხლის სამართლის კოდექსის 317-ე, 222-ე, 225-ე და 187-ე მუხლებით მიმდინარეობს.