თბილისის საქალაქო სასამართლოში 4 ოქტომბერს დაკავებული, სახალხო კრების ორგანიზატორთა სასამართლო პროცესი ტარდება.
სასამართლოს ეზოში დიდი რაოდენობით არიან მობილიზებული პოლიციელები, მათ შორის, ნიღბიანი სპეცრაზმელები.
სხდომაზე დასასწრებად ძალიან ბევრი ადამიანი მივიდა, მესამე დარბაზში შესვლა ყველამ ვერ მოახერხა.
ადვოკატი ბექა ბასილაია დარბაზის შეცვლას ითხოვს იმ მოტივით, რომ მესამე დარბაზში, სადაც სხდომა ტარდება, დასწრების მსურველთა უმრავლესობაც კი ვერ ეტევა.
საქართველოს პროკურატურამ ჯგუფური ძალადობის ორგანიზებისა და ხელმძღვანელობის, სტრატეგიული და განსაკუთრებული მნიშვნელობის ობიექტის ხელში ჩაგდების მცდელობის, კონსტიტუციური წყობილების ძალადობით შეცვლის და სახელმწიფო ხელისუფლების დამხობისაკენ მოწოდების ბრალდებით – პაატა ბურჭულაძეს, მურთაზ ზოდელავას, ირაკლი ნადირაძეს, პაატა მანჯგალაძესა და ლაშა ბერიძეს ბრალდება გუშინ, 6 ოქტომბერს წარუდგინა, რაც გულისხმობს:
სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობა, ჩადენილი ჯგუფურად;
ჯგუფური ძალადობის ორგანიზება და ხელმძღვანელობა;
მოწოდება საქართველოს კონსტიტუციური წყობილების ძალადობით შეცვლისკენ და სახელმწიფო ხელისუფლების დამხობისკენ.
– რადიო “თავისუფლების” ლაივბლოგის მიხედვით –