სინდისის პატიმრები, დავით ხომერიკი, ანდრო ჭიჭინაძე, ირაკლი მიმინოშვილი არქიმანდრიტ დოროთე ყურაშვილს ციხიდან წერილს უგზავნიან და მართალი და გაბედული სიტყვისთვის მადლობას უხდიან.
ევროპული მომავლის მცველები წერილში აღნიშნავენ, რომ მამა დოროთეს გვერდში დგომა დიდ ძალას აძლევთ.
გთავაზობთ წერილს უცვლელად:
მამა დოროთეს ბიჭებისგან.
გამარჯობა, დაგვლოცეთ ჩვენო სულიერო და კეთილო მოძღვარო. პირველ რიგში, მადლობა გვინდა გითხრათ და გადაგიხადოთ იმ მართალი და გაბედული სიტყვისთვის, რომელიც, ჩვენდა სამწუხაროდ, დღეს ასე იშვიათად ისმის ჩვენი ეკლესიებიდან. ჩვენთვისაც ასევე ძალიან დიდი ძალის მომცემია თქვენნაირი ადამიანებისა და პიროვნებების გვერდში დგომა, რომელიც ასე უშიშრად იბრძვის სიმართლისა და სამართლიანობისთვის, როგორც არ უნდა განვითარდეს მოვლენები, ჩვენ ყოველთვის თქვენს გვერდით ვიდგებით!
მადლობა თქვენი ლოცვისა და თანაგრძნობისთვის.
ჩვენ გვჯერა, რომ სინათლე ყოველთვის დაამარცხებს უიმედობას და ბოროტებას. მხნეობას და გამძლეობას გისურვებთ.
დიდი სიყვარულით და პატივისცემით, დავით ხომერიკი, ანდრო ჭიჭინაძე, ირაკლი მიმინოშვილი”.