“ქართული ოცნება” და ევროკავშირი, ბიძინა ივანიშვილი და ვიზალიბერალიზაცია ერთმანეთთან შეუთავსებელია, – ამის შესახებ კოალიცია “ცვლილებისთვის” წევრი თენგო თევზაძე საუბრობს.

მისი თქმით, მიუხედავად იმისა, რომ ევროკავშირმა „ქართულ ოცნებას“ 31 აგვისტომდე დაავალა ოთხი მოთხოვნის შესრულება, ის არათუ არ დგამს შესაბამის ნაბიჯებს, არამედ თავს ესხმის ევროპელ პარტნიორებს.

თევზაძის განცხადებით, სწორედ „ქართული ოცნება“ და ბიძინა ივანიშვილი არიან პასუხისმგებლები იმ საფრთხეზე, რომ საქართველოს შესაძლოა, უვიზო მიმოსვლის რეჟიმი შეუჩერდეს.

“ქართული ოცნება” და ევროკავშირი, ბიძინა ივანიშვილი და ვიზალიბერალიზაცია ერთმანეთთან შეუთავსებელია. იმიტომ არის შეუთავსებელი, რომ ჩვენმა ევროპელმა პარტნიორებმა მისცეს შესაბამისი, ადეკვატური დედლაინი, დაუწესეს 31 აგვისტოს სახით, რომ ის მოთხოვნები, 4 პუნქტი რაც იყო, “ქართულ ოცნებას” შეესრულებინა. “ქართული ოცნება” არათუ ამის შესრულებას არ აპირებს, არამედ თავს ესხმის ჩვენს ევროპელ პარტნიორებს. “ქართული ოცნება” არის მთავარი დამნაშავე ბიძინა ივანიშვილთან ერთად, იმაში, რომ საფრთხის ქვეშ დგას საქართველოსთვის უვიზო მიმოსვლა ევროკავშირთან, – ამბობს თენგო თევზაძე.

ევროკავშირმა 2025 წლის ივლისში საქართველო ოფიციალურად გააფრთხილა, რომ თუ ქვეყანა აგვსტოს ბოლომდე არ შეასრულებს სავიზო რეჟიმთან დაკავშირებულ მოთხოვნებს, შეიძლება ამოქმედდეს უვიზო მიმოსვლის შეჩერის მექანიზმი.

ამ ეტაპზე პროცესის საბოლოო შეფასება დაგეგმილია 2025 წლის ოქტომბერში, როცა ევროკავშირის საგარეო საქმეთა მინისტრები ფორმალურად შეიკრიბებიან და მიიღებენ კონკრეტულ გადაწყვეტილებას.