13 ივნისს ისრაელის არმიამ განაცხადა, რომ ირანში ათეულობით სამიზნეზე, მათ შორის ბირთვულ ობიექტებზე, იერიშები მიიტანა, რომელთა ფარგლებშიც ირანის სამხედრო მაღალჩინოსნები და მეცნიერები დახოცა.
ისრაელის პრემიერმინისტრის, ბენიამინ ნეთანიაჰუს თქმით, სამხედრო ოპერაცია “აღმავალი ლომის” ფარგლებში ირანის ტერიტორიაზე ბირთვული და ბალისტიკური საფრთხეების გასანეიტრალებლად 200-მდე ავიაგამანადგურებელი გაიგზავნა.
სოციალურ ქსელებში გავრცელებული ვიდეოების მიხედვით, რამდენიმე ირანული რაკეტა თელ-ავივის ცენტრში ჩამოვარდა. ისრაელის არმიის შტაბი აცხადებს, რომ სულ 150 ბალისტიკური რაკეტა იყო გაშვებული, რომელთა უმრავლესობა ისრაელის ჰსთ სისტემამ გააუვნებელყო.
ისრაელურ მედიაში სასწრაფო სამსახურზე დაყრდნობით ვრცელდება ინფორმაცია, რომ ირანის იერიშის შედეგად, სულ მცირე, 63 ადამიანი დაშავდა, რომელთაგან ერთი კრიტიკულ მდგომარეობაშია, ერთი სერიოზულ მდგომარეობაში, 8 საშუალოდ დაშავდა, ხოლო დანარჩენებმა მსუბუქი დაზიანებები მიიღეს. ბოლო საათებში გავრცელდა ინფორმაცია ერთი დაღუპულის შესახებ.
-ტაბულა-