დღეს მე ყველაზე მეტად მესმის ზაზა სარალიძის, ამიტომ მე და ჩემი ხალხი ყოველთვის ვიქნებით სარალიძეების გვერდით, – ამის შესახებ პანკისის ხეობაში ჩატარებული სპეცოპერაციის დროს გარდაცვლილი თემირლან მაჩალიკაშვილის მამამ, მალხაზ მაჩალიკაშვილმა პარლამენტთან გუშინ გამართულ აქციაზე განაცხადა.
მისი თქმით, სამართლიანობის აღდგენის გზაზე მნიშვნელოვანია საზოგადოების მხარდაჭერა. „დღეს ყველას კარგად გვესმის, რომ მნიშვნელოვანია სიმართლის დადგენა და ჩვენ ერთად, საქართველოს მოქალაქეებმა უნდა მივაღწიოთ სიმართლეს. ახლა ყველაზე მეტად გვჭირდება თქვენი დახმარება და გვერდში დგომა, რომ დავამტკიცოთ სიმართლე“, – აღნიშნა მალხაზ მაჩალიკაშვილმა.
პარლამენტთან აქცია „ნუ მოკლავ“ გუშინ გაიმართა, რომელიც ხორავას ქუჩაზე მოკლული დავით სარალიძის მამის, ზაზა სარალიძის მიერ იყო ორგანიზებული. ის მკვლელობის საქმის ობიექტურ გამოძიებას ითხოვს.