ზუგდიდის მუნიციპალიტეტის სოფელ დარჩელში, ტელმანის უბნის მაცხოვრებლებმა დღეს  აქცია გამართეს. მოსახლეობა ადგილობრივი ხელისუფლებისგან დაპირების შესრულებას ითხოვს. კერძოდ, ხანგრძლივი წვიმის შედეგად მდინარე ჯუმი დიდდება, არღვევს კალაპოტს და წყალი მოსახლეობას სახლებში უვარდება. ადგილობრივების განცხადებით, გადაუღებელმა წვიმამ გაანადგურა სახნავ-სათესები, ასევე შინაური ცხოველები და ფრინველები. რამდენიმე ოჯახში კი მოსულმა უხვმა ნალექმა საცხოვრებელი სახლების პირველი სართული დატბორა და დააზიანა. ტელმანის უბნის მაცხოვრებლები აცხადებენ, რომ ადგილობრივი ხელისუფლებისგან იყო შეპირება რომ მოხდებოდა ნაპირსამაგრი სამუშაოების ჩატარება, თუმცა ამ დრომდე აღნიშნული დაპირებიდან არაფერი გაკეთებულა. აღნიშნული პრობლემით დარჩელში, ტელმანის უბნის მოსახლეობამ აქცია მიმდინარე წლის ივნისის თვეშიც გამართა. მაშინაც და ახლაც ადგილობრივების მთავარი მოთხოვნა მდინარე ჯუმზე ნაპირსამაგრი სამუშაოების ჩატარება იყო. მოსახლეობა ამბობს, რომ აუცილებელია დამბის მშენებლობა და ამ მოთხოვნით ზუგდიდის მუნიციპალიტეტის გამგეობას რამდენჯერმე მიმართეს. აღნიშნული პრობლემის მოგვარების მოთხოვნით გამართულ აქციას გაერთიანებული დემოკრატების ზუგდიდის ოფისის ხელმძღვანელიც შეუერთდა. გოგიტა ბიგვავას განცხადებით, პრობლემა დროულად მოსაგვარებელია. დარჩელის მოსახლეობის მოთხოვნებს ზუგდიდის მუნიციპალიტეტის გამგეობაში გამოეხმაურნენ. უწყების საზოგადოებასთან ურთიერთობის სამსახურის უფროსის მაია ღურწკაიას განმარტებით, პრობლემა მოგვარებადია, თუმცა კონკრეტული ვადების დასახელება უჭირთ. ბოლო დღეების განმავლობაში მოსულმა უხვმა ნალექმა დარჩელის მოსახლეობას მნიშვნელოვანი პრობლემენი შეუქმნა. მოსახლეობის განცხადებით, აუცილებელია საჭირო ღონისძიებები დროულად იქნას გატარებული.