“საერთაშორისო იზოლაცია გაფართოვდება და ივანიშვილის პოლიტიკურ კისერზე ყულფი შევიწროვდება” – ამის შესახებ კოალიცია “ცვლილებისთვის” ერთ-ერთი ლიდერი, ნიკა მელია ბრიტანეთის საგარეო საქმეთა მინისტრისთვის ბიძინა ივანიშვილის დასანქცირების მოთხოვნით მიმართვის საპასუხოდ აცხადებს.

ნიკა მელია ამბობს, რომ ცივილიზებული სამყარო ქართველი ხალხის გვერდით დგას, რადგან საქართველოში დემოკრატიულმა ღირებულებებმა გაიმარჯვოს.

ეს საერთაშორისო იზოლაცია, რომელშიც თავი აღმოიჩინა ივანიშვილმა და მისმა რეჟიმმა, მხოლოდ და მხოლოდ, გაფართოვდება და ივანიშვილის პოლიტიკურ კისერზე და ყელზე ყულფი შევიწროვდება. დასავლური დემოკრატიები დგანან მკაფიოდ, ცხადად ქართული საზოგადოების გვერდით მხოლოდ ერთი მიზნის მიღწევისთვის, რომ ამ ქვეყანაში არჩევანის უფლება დაბრუნდეს, ამ ქვეყანაში დემოკრატიულმა ღირებულებებმა გაიმარჯვოს”, – ამბობს ნიკა მელია.

კონგრესმენი ჯო უილსონი და ბრიტანელი დეპუტატი ჯეიმს მაკკლირი დიდი ბრიტანეთის საგარეო საქმეთა მინისტრს ბიძინა ივანიშვილის დასანქცირების მოთხოვნით მიმართავენ.

დიდი ბრიტანეთის საგარეო საქმეთა მინისტრისთვის, დევიდ ლემისთვის გაგზავნილ ერთობლივ წერილს ჯო უილსონი პლატფორმა X-ზე აქვეყნებს.
“დაუწესეთ სანქციები მჩაგვრელ ოლიგარქ ივანიშვილს, რომელმაც ხელი შეუწყო პუტინის ინტერვენციას საქართველოს დემოკრატიაში და ძირი გამოუთხარა ქვეყნის სუვერენიტეტს” – წერია განცხადებაში, სადაც ასევე აღნიშნულია, რომ “ივანიშვილის პარტია ხელს უწყობს ქვეყნის სვლას პუტინის ჯიბისკენ”.

ამასთან, ამერიკელი და ინგლისელი დეპუტატები კატეგორიულად მოითხოვენ, რომ “ქართული ოცნების” საპატიო თავმჯდომარის შავ სიაში შეყვანის გარდა, საქართველოსთან ბრიტანეთმა სტრატეგიული პარტნიორობა შაეჩეროს.