კრიზისი უმრავლესობაში. ქართული ოცნება კონსულტაციებისთვის ემზადება. უკვე ცნობილია, რომ მმართველი გუნდი დღეს შეიკრიბება. შეხვედრაზე მთავარი საკითხი გედევან ფოფხაძის გადაწყვეტილება იქნება. სავარაუდოდ გუნდის შიგნით მწვავე დისკუსიაა მოსალოდნელი, რადგან უმრავლესობის გადაწყვეტილებას, ნინია კაკაბაძის მხარდაჭერის შესახებ, ფოფხაძის მსგავსად სხვა დეპუტატებიც აპროტესტებენ. მიიღებს თუ არა მონაწილეობას ამ კონსულტაციებში თავად გედევან ფოფხაძე, უცნობია. მისი თქმით, უმრავლესობის ლიდერი ჯერ არ დაკავშირებია.
"ვაპირებ მშვიდად შევხვდე აღდგომას და მერე ვიფიქრებ მომავალზე. არჩილი ძალიან კარგი ადამიანია და როცა ჩათვლის საჭიროდ ნებისმიერ მომენტში შევხვდები არ მაქვს მაგის პრობლემა,"-აცხადებს ფოფხაძე.
"კურიერის" კითხვაზე, შეცვლის თუ არა ფოფხაძე უმრავლესობის დატოვების გადაწყვეტილებას, იგი პასუხობს:
"ვერ გეტყვით, ემოციურად დატვირთული დღე იყო და არ მინდა ამაზე კომენტარის გაკეთება."
გედევან ფოფხაძისგან გადაწყვეტილების შეცვლის მოლოდინში არიან უმრავლესობის სხვა წევრები.
"ძალიან დიდი იმედი მაქვს რომ ჩვენი გუნდი დარჩება ისევ ერთიანი როგორიც აქამდე იყო,"-აცხადებს სოფიო კილაძე.
უმრავლესობის კიდევ ერთი წევრი, დავით მათიკაშვილი კი ფოფხაძის გადაწყვეტილებას ნაჩქარევს უწოდებს.
"ეს ნაჩქარევი გადაწყვეტილება იყო, როგორც უმრავლესობის ლიდერმა თვითონ განაცხადა ექნება მასთან მოლაპარაკება. არ მაქვს მე იმის მოლოდინი რომ უმრავლესობის რიგებს ვინმე დატოვებს,"-აცხადებს მათიკაშვილი.