84 მომხრე, 4 წინააღმდეგი – პრეზიდენტის ვეტო პარლამენტის სხდომაზე დაძლეულია. ამ წუთებში საპარლამენტო უმრავლესობის წევრები დემონსტრანტთა შეძახილების ფონზე “მონებო!”, “მოღალატეებო!”, “რუსებო” ტოვებენ პარლამენტის შენობას თავიანთი ავტომანქანებით, ჭიჭინაძის ქუჩა და პარლამენტის ეზო სავსეა საპატრულო, კრიმინალური პოლიციის თანამშრომლებითა და სპეცრაზმელებით.
სუფთავდება ჩიტაძის ქუჩა, პოლიცია აიძულებს დემონსტრანტებს, ტროტუარებიც გაათავისუფლონ და ჩიტაძის ქუჩის დასაწყისისკენ გადაიწიონ. მობილიზებულია დიდი რაოდენობით საპოლიციო ძალები.
პროცედურების მიხედვით, კანონი გადაეგზავნება საქართველოს პრეზიდენტს, რომელიც, სავარაუდოდ, ისევ არ მოაწერს ხელს კანონს, რის შემდეგაც 5 დღის ვადაში დაბრუნდება პარლამენტში და ხელს მოაწერს შალვა პაპუაშვილი, რაც იმას ნიშნავს, რომ “რუსულ კანონზე” სრულ პასუხისმგებლობას ამ კანონზე აიღებს საქართველოს პარლამენტის უმრავლესობა, ანუ “ქართული ოცნება”.
პოლიტიკური განცხადებების შემდეგ, კენჭისყრის დაწყებამდე, სხდომა ოპოზიციური პარტიების წარმომადგენლებმა დატოვეს და დემონსტრანტებს შეუერთდნენ.