ფემიციდის მორიგი ფაქტი თბილისში: ვარკეთილის მასივში, 30 წლის გიორგი კავლელაშვილმა ცოლს, 27 წლის ქეთევან ედიბერიძეს მრავლობითი ჭრილობები მიაყენა, რის შედეგადაც ქალი ინგოროყვას კლინიკაში გარდაიცვალა.
ქმარმა დანა მძინარე ცოლს რამდენჯერმე ჩაარტყა, შემდეგ კი თვითდაზიანებები მიიყენა, თუმცა, მას ოპერაცია ჩაუტარდა და ამ დროისთვის სტაბილურად მძიმედაა.
ქეთევან ედიბერიძეს 4 თვის ახალშობილი დარჩა. მკვლელობა დილის საათებში მოხდა. მეზობლები ამბობენ, რომ დილის საათებში ყვირილის ხმა გაიგეს, თუმცა საეჭვოდ არ ჩაუთვლიათ.
წყვილთან ერთად სახლში ქმრის მამაც ცხოვრობდა, დედა კი საზღვარგარეთაა. უცნობია სახლში იმყოფებოდა თუ არა მამამთილი მკვლელობის დროს.
არსებული ინფორმაციით, კაცი ხშირად სვამდა, რაც კონფლიქტის მიზეზი ხდებოდა. თუმცა, დანაშაულის მოტივი უცნობია. ინფორმაციას მთავარი არხი ავრცელებს.