ჩვენ მადლიერები ვართ პოლონეთის, რომელიც, უკლებლივ მისი ყველა მთავრობის პირობებში, უპირობოდ უჭერდა, უჭერს და მომავალშიც დაუჭერს მხარს საქართველოს დამოუკიდებლობას, ტერიტორიულ მთლიანობასა და სუვერენიტეტს, – ასე ეხმაურება „ერთიანი ნაციონალური მოძრაობა“ პოლონეთის საგარეო საქმეთა მინისტრის, ზბიგნევ რაუს განცხადებას, რომ პოლონეთი მხარს უჭერს საქართველოს ევროპულ მისწრაფებას.

„ნაციონალური მოძრაობა“ მადლობას უხდის პოლონეთს, რომელიც „საქართველოს სხვა მეგობრებთან ერთად, მუდმივად აყენებს პრეზიდენტ სააკაშვილის საკითხს საერთაშორისო არენაზე“.

„ჩვენ მადლიერები ვართ პოლონეთის, რომელიც – უკლებლივ მისი ყველა მთავრობის პირობებში – უპირობოდ უჭერდა, უჭერს და მომავალშიც დაუჭერს მხარს საქართველოს დამოუკიდებლობას, ტერიტორიულ მთლიანობასა და სუვერენიტეტს. ეს მხარდაჭერა არაერთხელ დაუმტკიცებია საქმით საერთაშორისო არენაზე. პოლონეთი აქტიურად უჭერს მხარს საქართველოს გაწევრიანებას ნატო-სა და ევროკავშირში, რაც ქვეყანაში საფუძვლიანი რეფორმების გატარებას გულისხმობს, განსაკუთრებით კანონის უზენაესობის სფეროში. გვსურს, მადლობა გადავუხადოთ პოლონეთს, რომელიც, საქართველოს სხვა მეგობრებთან ერთად, მუდმივად აყენებს პრეზიდენტ სააკაშვილის საკითხს საერთაშორისო არენაზე და საქართველოს მთავრობასთან ურთიერთობაში.

პრეზიდენტ სააკაშვილს თავისი გათავისუფლება საქართველოს მიერ ევროკავშირის წევრი ქვეყნის კანდიდატის სტატუსის წინაპირობად არ დაუყენებია. ამავდროულად, ჩვენი ევროპელი პარტნიორებისთვის გაუგებარია, როგორ უნდა გააგრძელოს წინსვლა ქვეყანამ, მათ შორის, ევროკავშირისა და ნატო-ს წევრობის მიმართულებით, თუ საქართველოში იქნება პოლიტიკური დევნა და მიხეილ სააკაშვილი დარჩება პატიმრობაში.

ჩვენ კვლავ ხაზს ვუსვამთ იმ ფაქტს, რომ პრეზიდენტ სააკაშვილის უკანონო და უსამართლო პოლიტიკური პატიმრობა წინააღმდეგობაშია ევროკავშირის 12 რეკომენდაციის საკვანძო საკითხებთან. ესენია – დეპოლარიზაცია, კანონის უზენაესობის დამკვიდრება, სამართლიანი სასამართლოს უფლების განხორციელება. ყველაზე დიდი პროდასავლური ოპოზიციური პარტიის – „ერთიანი ნაციონალური მოძრაობის“ დამფუძნებლისა და ლიდერის ციხეში ყოფნა 2024 წლის საპარლამენტო არჩევნების წინ ეჭვქვეშ დააყენებს ამ არჩევნების სამართლიანობას. აღსანიშნავია, რომ საქართველოს მოქალაქეების 58% მხარს უჭერს პრეზიდენტ სალომე ზურაბიშვილის მიერ პრეზიდენტ სააკაშვილის შეწყალებას.

საქართველოს ევროკავშირში გაწევრიანების პროცესი 2009 წელს ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ შეთანხმების (DCFTA) მოლაპარაკებებისთვის მომზადებით დაიწყო. ეს შეუძლებელი იქნებოდა იმ ფუნდამენტური რეფორმების გარეშე, რაც საქართველომ ვარდების რევოლუციის შემდგომ მიხეილ სააკაშვილის პრეზიდენტობის დროს განახორციელა. აღსანიშნავია, რომ ევროკავშირის დროშა პოლიტიკური სიმბოლიკის ნაწილად სწორედ მიხეილ სააკაშვილმა აქცია.

„ერთიანი ნაციონალური მოძრაობა“ ვაცხადებთ, რომ სტატუსის საკითხის გადაწყვეტის პარალელურად, იმისათვის, რომ საქართველოს ევროკავშირისა და ნატო-ს წევრობის გზაზე წინსვლა გააგრძელოს, აუცილებელია საქართველოში პოლიტიკური დევნის დასრულება და პრეზიდენტ სააკაშვილის გათავისუფლება. კიდევ ერთხელ მადლობას ვუხდით პოლონეთის საგარეო საქმეთა მინისტრს საკითხის მკაფიოდ და საჯაროდ დაფიქსირებისთვის“, – განაცხადა „ერთიანი ნაციონალური მოძრაობის“ საგარეო მიმართულების მდივანმა ზურაბ ჭიაბერაშვილმა ბრიფინგზე.