ზუგდიდის მუნიციპალიტეტის კონფლიქტისპირა სოფელ რიყეში საავტომობილო გზის მშენებლობა აქტიურად მიმდინარეობს. ინფრასტრუქტურული სამუშაოები დღეს ადგილზე ზუგდიდის მუნიციპალიტეტის გამგებელმა ედიშერ თოლორაიამ ადგილობრივი ხელისუფლების სხვა წარმომადგენლებთან ერთად დაათვალიერა. ამ გზით ოკუპირებულ აფხაზეთში მცხოვრები მოქალაქეების ნაწილი დანარჩენ საქართველოს დაუკავშირდება. ამასთან, რიყის რეაბილიტირებული გზით რამდენიმე სოფელი ისარგებლებს. მუნიციპალიტეტის გამგებლის ედიშერ თოლორაიას ინფორმაციით, საგზაო ინფრასტრუქტურის მოწესრიგებასთან ერთად დაგეგმილია სანიაღვრე არხების მოწესრიგება, ამასთან მიმდინარეობს დასასვენებელი პარკის მოწყობა და რიყის სპორტდარბაზის სახურავის რეაბილიტაცია. სოფელ რიყეში უკვე დასრულებულია ორი ხიდის მოწესრიგების პროცესი და ორივე მდინარეზე მოხდა თანამედროვე ხიდ-ბოგირების მოწყობა. ამასთან, გამგებლის განცხადებით განხორციელდა სოფლის შიდა გზების მოხრეშვის პროცესი. სოფელში საგზაო ინფრასტრუქტურის მოწესრიგება რეგიონალური განვითარების ფონდისა და მუნიციპალიტეტის გამგეობის თანადაფინანსებით ხორციელდება. პროექტის ღირებულება შეადგენს 1,250 000 (მილიონ ორასორმოცდაათიათას) ლარს. პროექტის დასრულების შემდეგ ახალი საგზაო ინფრასტრუქტურით სოფლის 3208 ადგილობრივი ისარგებლებს. საგზაო ინფრასტრუქტურის მოწესრიგების შემდეგ მთლიანად განათდება რიყე-ზუგდიდის დამაკავშირებელი ცენტრალური გზა. ამ ეტაპზე მიმდინარე სამუშაოებში ადგილობრივი მოსახლეობაა დასაქმებული.