2022 წელს, სამუშაო ადგილზე 35 ადამიანი გარდაიცვალა, დაშავდა 330 დასაქმებული. ინფორმაციას “ინტერპრესნიუსი” შრომის ინსპექციის სამსახურიდან მიღებული პასუხის მიხედვით ავრცელებს. გარდაცვლილთაგან ყველა კაცია, დაშავებულებიდან კი 69 ქალი და 261 კაცი.
“2022 წლის საანგარიშო პერიოდში სამუშაო სივრცეში მომხდარი უბედური შემთხვევებიდან დაფიქსირდა 3 მასობრივი უბედური შემთხვევა. დაშავებულთაგან 87 შემთხვევა კლასიფიცირდა, როგორც მძიმე უბედური შემთხვევა (ქალი 11; კაცი 76); 243 შემთხვევა კი, როგორც საშუალო სიმძიმის უბედური შემთხვევა (ქალი 58; კაცი 185)”, – ნათქვამია უწყების პასუხში, რომელსაც “ინტერპრესნიუსი” ავრცელებს.