იტალიის სენატმა ჰოლოდომორი უკრაინელი ხალხის წინააღმდეგ ჩადენილ გენოციდად აღიარა.
რეზოლუციას 130-მა დეპუტატმა დაუჭირა მხარი, წინააღმდეგ ხმა კი არცერთს მიუცია, ოთხმა მათგანმა კი კენჭისყრაში მონაწილეობისგან თავი შეიკავა.
იტალიელმა სენატორებმა რეზოლუციაში აღნიშნეს, რომ 1932 – 1933 წლებში საბჭოთა კავშირმა, რომელსაც სტალინი მეთაურობდა, განზრახ გამოიწვია მასობრივი შიმშილობა, რამაც მილიონობით ადამიანი იმსხვერპლა, ძირითადად, გლეხები და მცირე მიწის მესაკუთრეები.
“ჰოლოდომორისა და უკრაინელი ხალხის წინააღმდეგ საბჭოთა დანაშაულების გახსენებას დღეს კიდევ უფრო დიდი მნიშვნელობა ენიჭება, როცა რუსეთი კიდევ ერთხელ შეიჭრა უკრაინაში, უკრაინული ნაციონალური იდენტობის წაშლის განახლებული მცდელობისთვის”, – წერია რეზოლუციაში.
ჰოლოდომორს, როგორც უკრაინელი ხალხის წინააღმდეგ ჩადენილ გენოციდს, 35-მდე ქვეყანა აღიარებს.