რუსეთმა შავი ზღვის მარცვლეულის შეთანხმება შეაჩერა. კრემლის პრესსპიკერი დიმიტრი პესკოვი აცხადებს, რომ ამის მიზეზი რუსეთთან დაკავშირებული შეთანხმების ნაწილის შეუსრულებლობაა.
2022 წლის ივლისში თურქეთისა და გაერთიანებული ერების ორგანიზაციის შუამავლობით გაფორმებული შეთანხმების ვადა ოფიციალურად იწურება საღამოს.
“ფაქტობრივად, შავი ზღვის ხელშეკრულებები დღეს აღარ მოქმედებს. როგორც ადრე რუსეთის ფედერაციის პრეზიდენტმა განაცხადა, ბოლო ვადა 17 ივლისია. სამწუხაროდ, ამ შეთანხმებაში რუსეთთან დაკავშირებული ნაწილი ჯერ არ განხორციელებულა. ამიტომ, მისი მოქმედება წყდება,” – აღნიშნა პესკოვმა.
მისი მტკიცებით, მოსკოვი დაუყოვნებლივ დაუბრუნდება შავი ზღვის მარცვლეულის შეთანხმებას მას შემდეგ, რაც შეთანხმების რუსული ნაწილი შესრულდება.
ცნობისთვის, “მარცვლეულის შეთანხმება” რუსეთ-უკრაინას შორის, გაეროსა და თურქეთის შუამავლობით, 22 ივლისს სტამბოლში დაიდო. ის უკრაინიდან ხორბლისა და სოფლის მეურნეობის სხვა პროდუქციის ექსპორტს ითვალისწინებდა და განსაკუთრებით მნიშვნელოვანი იყო აფრიკისა და აზიის ქვეყნების ხორბლით მომარაგებისთვის.