ვანისა და ბაღდათის მიტროპოლიტი მეუფე ანტონ ბულუხია მოსაყდრე შიოს შესაძლო მოწამვლასთან დაკავშირებით ამბობს, რომ ის ნივთიერებები, რომლებიც მას სისხლში აღმოაჩნდა, “ჰაერიდან არ ჩნდება” -“გაგებაში არა ვარ ნამდვილად, წარმოუდგენელია სიმართლე გითხრათ. ფაქტი ის არის, რომ ორგანიზმში აღმოჩენილი არის და ეს ისეთი რამ არის, რომელიც ჰაერიდან არ ჩნდება. ერთადერთი ვისზედაც ეჭვი არა მაქვს, ჩემ თავზე არა მაქვს” ამბობს მეუფე ანტონი, რომელიც მცხეთაში, სვეტიცხოვლობის სადღესასწაულო წირვას ესწრებოდა.
წირვა თავად მეუფე შიომ ჩაატარა და მას პატრიარქი არ დასწრებია, სავარაუდოდ ჯანმრთელობის მდგომარეობიდან გამომდინარე.
შეგახსენებთ, “მთავარმა არხმა” 5 ივლისს გაავრცელა ინფორმაცია, რომ პატრიარქის მოსაყდრე მოწამლეს და მის სისხლში დარიშხანის კვალი აღმოჩნდა.
სისხლში მომწამვლელი ნივთიერების არსებობის შესახებ ინფორმაცია 6 ივლისს საპატრიარქოს საზოგადოებასთან ურთიერთობის სამსახურის უფროსმა, ანდრია ჯაღმაიძემ დაადასტურა. როგორც ჯაღმაიძემ აღნიშნა, საპატრიარქო მიიჩნევს, რომ მოწამვლასთან დაკავშირებით ინფორმაციის უტყუარად დადასტურებისთვის “დამატებითი კვლევები და გამოძიებაა საჭირო”.
შინაგან საქმეთა სამინისტრომ გამოძიება განზრახ მკვლელობის მცდელობის მუხლით დაიწყო.