უკრაინამ კონტრშეტევის დაწყებიდან დღემდე, ქვეყნის სამხრეთით, ბერდიანსკისა და მელიტოპოლის მიმართულებებზე, 169 კვადრატული კილომეტრი ტერიტორია გაათავისუფლა, რაც დაახლოებით ოდესის ტერიტორიის პროპორციულია. ამის შესახებ ინფორმაციას უკრაინის შეიარაღებული ძალების გენერალური შტაბი ავრცელებს.
უწყების სპიკერის, ანდრეი კოვალევის ცნობით, გასულ კვირას უკრაინელი ჯარისკაცები ორი მიმართულებით, ერთი კილომეტრზე მეტით დაწინაურდნენ.
“ზოგადად, თავდასხმის დაწყებიდან ამ მიმართულებით [ბერდიანსკისა და მელიტოპოლის] წინსვლა 8,6 კილომეტრია. გასული კვირის განმავლობაში უკრაინის სამხრეთით 10 კვადრატულ კილომეტრზე მეტი უკრაინული მიწა გათავისუფლდა,” – აღნიშნა კოვალევმა.
დეოკუპირებულ მიწებზე უკრაინის ძალები ამ დროისთვის განაღმვით სამუშაოებს ასრულებენ.