ცენტრალური საარჩევნო კომისიის წინასწარი მონაცემებით, მარტვილში 19 უბნის შედეგების მიხედვით, პარლამენტის შუალედურ არჩევნებში კოალიცია "ქართული ოცნების" მაჟორიტარობის კანდიდატი სოსო დანელია ლიდერობს.ამ ეტაპზე დათვლილი ხმების რაოდენობით, სოსო დანელიას ხმა 4412-მა ამომრჩეველმა მისცა, რაც საერთო რაოდენობის 69,63 %-ს შეადგენს. 1924-მა ამომრჩეველმა (30,63 %) დაუჭირა მხარი "პატრიოტთა ალიანსის" კანდიდატს ეთერ მეძველიას. 

მარტვილში ხმის მიცემა დღეს სულ 39 საარჩევნო უბანზე მიმდინარეობდა და მიუხედავად იმისა, რომ დასათვლელი რჩებოდა ამ უბნების ნახევარზე მეტში მიცემული ხმები,  "ქართული ოცნების'' აქტივისტებმა  უკვე აღნიშნეს გამარჯვება, გვიან ღამემდე მოძრაობდნენ ქუჩებში ავტომობილების გაბმული სიგნალებით, დროშებითა და შეძახილებით.

ხობში გამართულ საკრებულოს შუალედურ არჩევნებში ,,ქართული ოცნების"კანდიდატს მელორ გელანტიას ამომრჩევლების  73,44 პროცენტმა მისცა ხმა, ,,საქართველოს პატრიოტთა ალიანსის'' წარმომადგენელს ტარიელ ზარანდიას  –   26,56 % .

საგარეჯოში 10 უბნის შედეგებით ,,ქართული ოცნების''კანდიდატი თამარ ხიდაშელი იმარჯვებს – ხმების 51,1 პროცენტით, ,,პატრიოტთა ალიანსის'' ლიდერი ირმა ინაშვილი მეორე ადგილზეა, მას ხმების 45,68 % ერგო, შემდეგ მოდიან მიხეილ ანდღულაძე – 1,71%,გიორგი დავითაია – 1,05, ზურაბ ჯორბენაძე – 0,44%