ბაჩანა შენგელიამ იუსტიციის სამინისტროსთან სასამართლო დავა მოიგო. საქმე ეხება 2020 წელს შენგელიასთვის სანოტარო საქმიანობის შეჩერებას. სასამართლოს გადაწყვეტილებით, იუსტიციის სამინისტროს ბაჩანა შენგელიასთვის 12 800 ლარის გადახდა დაეკისრა. ინ ფორმაცია მან სოციალურ ქსელში გამოაქვეყნა, სადაც ასევე წერს, რომ ამ თანხის ნაწილს ის მე-6 საჯარო სკოლას გადაურიცხავს,რომლის დირექტორიც იყო ია კერზაია (ბაჩანა შენგელიას დედა), ხოლო ნაწილს კახათის საჯარო სკოლას.
“საბოლოოდ მოვიგე დავა იუსტიციის სამინისტროს წინააღმდეგ, 2020 წელს სანოტარო საქმიანობა უკანონოდ რომ შემიჩერეს, აი იმ საქმეზე. 12 800 ლარის გადახდა დაეკისრათ. ეს ამბავი იას წინააღმდეგ დაწყებული დევნის გაგრძელება იყო უკვე ჩემს წინააღმდეგ, ამიტომ თანხას მე-6 საჯარო სკოლაში გადავრიცხავ, ოღონდ მას შემდეგ, რაც სკოლას არჩეული დირექტორი ეყოლება (გამოცდა უკვე ჩატარდა და იმედია ეს საკითხი მალე გადაწყდება. თუ რატომ ასე, ამაზე სხვა დროს). ნაწილს ახალკახათის საჯარო სკოლაში ჩავრიცხავ, რომელიც იამ დაამთავრა. “- წერს ბაჩანა შენგელია.
ცნობისთვის, ბაჩანა შენგელიას სანოტარო საქმიანობა იუსტიციის სამინისტრომ 2020 წელს აუკრძალა, რასაც შენგელია დედის საქმეს უკავშირებდა, რომელიც ზუგდიდის მე-6 საჯარო სკოლის დირექტორი იყო. ია კერზაია 2018 წლის 9 დეკემბერს ინსულტით გარდაიცვალა, რასაც ბაჩანა შენგელია საპრეზიდენტო არჩევნების პირველი ტურის შემდეგ მასზე განხორციელებულ პოლიტიკურ ზეწოლას უკავშირებს. სარჩელი სტრასბურგის სასამართლოშია გაგზავნილი.