საქართველოს პარლამენტის შენობასთან მიმდინარე აქციაზე, წვრილმანი ხულიგნობისა და პოლიციის დაუმორჩილებლობისთვის 36 ადამიანი დააკავეს.
დაკავებულების ნაწილი ხელწერილის საფუძველზე გაათავისუფლეს, ნაწილი კი ჯერ შინაგან პოლიციის დეპარტამენტში, მოგვიანებით კი წინასწარი დაკავების იზოლატორში გადაიყვანეს.
დაკავებულთა შორის იყვნენ ჟურნალისტებიც: გამოცემა “პუბლიკას” დირექტორმა და “”ტაბულას“” ჟურნალისტმა შინაგან საქმეთა სამინისტროს შენობა გვიან ღამით დატოვეს.
მანამდე კი მათი გათავისუფლების მოთხოვნით მედიაორგანიზაციის აქციაც გამართეს. აქციაზე პროფესიული მოვალეობის შესრულებისას დაშავდა “TV პირველის” ოპერატორი, რომელმაც ტერიტორია სამართალდამცავების დახმარებით დატოვა.
გუშინ განვითარებულ მოვლენებს ჟურნალისტური ეთიკის ქარტიაც გამოეხმაურა. განცხადებაში აღნიშნულია, რომ ქარტია გმობს მედიის წარმომადგენლებისთვის ჟურნალისტურ საქმიანობაში ხელის შეშლას.
სამოქალაქო აქტივისტები და “ერთიანი ნაციონალური მოძრაობის” წევრები “ქართული ოცნების” თავმჯდომარეს, ირაკლი კობახიძეს TV იმედთან.
ადგილზე სამართალდამცველები იყვნენ მობილიზებულები, თუმცა ოცნების თავმჯდომარე შენობიდან ისე გააპარეს, რომ აქტივისტებთან მას არ ჩაუვლია.
„ვინც ამ კანონს რუსულს უწოდებს, ის უბრალოდ ცრუპენტელაა” ;
“ჩვენ გვაქვს ღირსება და გვინდა პატიოსანი თამაშის წესები”;
“დღეს პარლამენტში იყო ეკლესიის მაგინებლების აქცია”; – ეს ირაკლი კოახიძის ციტატებია, რომლებიც მან ტვ იმედის ეთერში თქვა.
შეგახსენებთ, რომ პარლამენტის ორმა კომიტეტმა “უცხოელი აგენტების რეგისტრაციის შესახებ” და “უცხოური გავლენის გამჭვირვალეობის შესახებ” კანონპროექტებს მხარი დაუჭირა.
საუბარია საგარეო ურთიერთობათა და თავდაცვისა და უშიშროების გაერთიანებულ კომიტეტებზე. კანონპროექტების მხარდაჭერამდე დოკუმენტების განხილვა პროტესტის ფონზე მიმდინარეობდა.
პარლამენტის წევრი, საზოგადოებრივი მოძრაობის “ხალხის ძალა” დამფუძნებელი გურამ მაჭარაშვილი აცხადებს, რომ კანონპროექტის სახელწოდება შესაძლოა მეორე მოსმენაზე გადაიხედოს.
“ის, რომ დღევანდელი ორივე კანონპროექტი, ემსახურება ფინანსურ გამჭვირვალობას, ეს იმითაც დაინახა საზოგადოებამ, რომ არავის არ უთქვამს, ფინანსური გამჭვირვალობა, როგორც პრინციპი არ არის საჭიროვო.
რაც შეეხება დეტალებს, ეს სათაური იქნება თუ სხვა-არაერთხელ განიმარტა რეგლამენტის შესაბამისად, რომ ეს ჩვენ შეგვიძლია და ვალდებულიც ვართ, რომ ეს მეორე მოსმენის დროს განვიხილოთ. ასევე რაზეც იყო საუბარი, რომ საჯარო რეესტრში არის ეს ინფორმაცია, კონკრეტულმა მაგალითებმა დაადასტურა, რომ არ არის არც საგადასახადოში და არც ფინანსთა სამინისტროში, ასეთი ტიპის ინფორმაციები,”-აცხადებს გურამ მაჭარაშვილი.
რაც შეეხება პარლამენტის საგარეო ურთიერთობათა კომიტეტის თავმჯდომარის მოსაზრებას. ნიკოლოზ სამხარაძემ კოლეგებს კანონპროექტზე მხარდაჭერას სთხოვა, რათა საკითხი შემდგომი განხილვისთვის იურიდიულ კომიტეტს გადაეცეს.
“კომიტეტი მხარს უჭერს გამჭვირვალობის და ანგარიშგების პრინციპს. შევიტანოთ დასკვნაში, რომ ტერმინებთან დაკავშირებით, რომელიც მოცემულ კანონპროექტში, ამ ტერმინებს სჭირდება გადახედვა და შემდგომი დისკუსია.
ჩვენ გადავცეთ ეს საკითხი წამყვან კომიტეტს და მინდა, რომ საგარეო ურთიერთობათა კომიტეტის წევრებს გთხოვოთ მხარდაჭერა, რომ ეს საკითხი გადაეცეს იურიდიულ კომიტეტს. რაც შეეხება ე.წ. ამერიკულ ვერსიას, ამასაც გთავაზობთ, რომ გადავცეთ იურიდიულ კომიტეტს განსახილველად,”-აცხადებს ნიკოლოზ სამხარაძე.