ბადრი ესებუა უარს ამბობს მისი ინტერესები ადვოკატმა ალექსანდრე კობაიძემ დაიცვას. შესაბამისი განცხადებით დღევანდელ პროცესზე მოსამართლეს მიმართეს, რასაც კობაიძეც დაეთანხმა და სხდომა დატოვა. ესებუამ სურვილი გამოთქვა მისი ადვოკატები მხოლოდ იოსებ ჯანაშია და ხათუნა ჯანაშია იყვნენ.
პროცესი ზუგდიდის რაიონულ სასამართლოში ამ წუთებში მიმდინარეობს.
შეგახსენებთ, ორწლიანი ძებნის შემდეგ პოლიციამ ბადრი ესებუა 8 თებერვალს დააკავა. მას ბრალად ედება 2020 წლის 21 ოქტომბერს საქართველოს ბანკზე თავდასხმა და 40-ზე მეტი პირის მძევლად აყვანა.
საქმეზე გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლად ხელში ჩაგდებას ტერორისტული მიზნით და ცეცხლსასროლი იარაღის უკანონოდ შეძენა-შენახვა-ტარებას გულისხმობს.
ბადრი ესებუა ბრალს არ აღიარებს.
ზუგდიდის სასამართლოში მიმდინარე პროცესებზე დაზარალებულები იკითხებიან. დღევანდელ პროცესს თავად ესებუაც ესწრება.