პოლიტიკური ლიდერები უკრაინის ელჩის მოვალეობის შემსრულებელს შეხვდნენ. ანდრი კასიანოვთან საინფორმაციო სახის შეხვედრა “დროას”, “გირჩი მეტი თავისუფლებისა” და “სტრატეგია აღმაშენებლის” წარმომადგენლებმა გამართეს. როგორც შეხვედრის დასრულების შემდეგ მათ განაცხადეს იმსჯელეს უკრაინაში მიმდინარე ომზე, განიხილეს 24 თებერვალს დაანონსებული აქცია, რომელიც რუსთაველის გამზირზე გაიმართება და აინტერესებდათ რა სახის ჰუმანიტარული დახმარება სჭირდება ახლა უკრაინას.
საელჩოდან გამოსულმა “სტრატეგია აღმაშენებლის” ლიდერმა, გიორგი ვაშაძემ განაცხადა, რომ მისი ინფორმაციით, რუსეთის ტყვეობაში ამ დროისათვის 2 ქართველი მებრძოლი იმყოფება, რომლებიც მარიუპოლში იბრძოდნენ.
“ორი ქართველი არის ტყვედ ჩავარდნილი. ერთ-ერთს ოჯახის წევრებიც დაეღუპა დნეპრში საცხოვრებელი სახლის დაბომბვის დროს და სამწუხაროდ, დღემდე ვერ ხერხდება ამ ადამიანების გათავისუფლება. მე პირადად უკრაინული კონტაქტებით ბევრს ვმუშაობ და საელჩოსთანაც მქონდა აქამდე კომუნიკაცია, მაქსიმალურად შევეცდებით ჩვენი ქართველი ბიჭები გავათავისუფლოთ ტყვეობიდან” განაცხადა ვაშაძემ.
მისივე თქმით, საქართველოს ხელისუფლება არაფერს აკეთებს, რომ ქართველი მეომრები ტყვეობიდან გამოიხსნას.