დღეს, 14 თებერვალს ბრიუსელში ნატოს წევრი სახელმწიფოების თავდაცვის მინისტრების შეხვედრა იწყება. შეხვედრის მთავარი თემა კიევისთვის შემდგომო სამხედრო დახმარებაა. იენს სტოლტენბერგმა თქვა, უკრაინაში შეჭრიდან ერთი წლის შემდეგაც რუსეთის პრეზიდენტი არ ემზადება მშვიდობისთვის, არამედ იწყებს ახალ შეტევებს. მისი თქმით, უკრაინას უნდა მიაწოდონ ის, რაც სჭირდება ომის მოსაგებად, სამართლიანი და მდგრადი მშვიდობის მისაღწევად.
გარდა უკრაინის თემისა, მინისტრები განიხილავენ როგორ გააძლიერონ საქართველოს, მოლდოვისა და ბოსნია და ჰერცოგოვინას მიმართ მხარდაჭერა.
“მინისტრები ასევე განიხილავენ, თუ როგორ გავაძლიეროთ ჩვენი პრაქტიკული მხარდაჭერა ბოსნია და ჰერცეგოვინას, საქართველოსა და მოლდოვას მიმართ. ნატოს სამი ღირებული პარტნიორი, რომლებიც რუსეთის საფრთხის წინაშე დგანან”, – თქვა სტოლტენბერგმა.
მისი განცხადებით, ოთხშაბათს მოკავშირეები მიიღებენ გადაწყვეტილებებს ნატოს შეკავებისა და თავდაცვის კიდევ უფრო გასაძლიერებლად.