სხვადასხვა მოწვევის პარლამენტის წევრებმა ორბელიანის სასახლესთან საქართველოს პრეზიდენტს სპეციალური განცხადებით მიმართეს და მოუწოდეს, ქვეყნის ეროვნული ინტერესებიდან გამომდინარე, შეიწყალოს მესამე პრეზიდენტი, მიხეილ სააკაშვილი.
მათი თქმით, პაციენტს დრო ეწურება, დუმილი კი ასეთ სიტუაციაში დანაშაულია. გთავაზობთ განცხადებას:
“საქართველოს მესამე პრეზიდენტი, მსოფლიოს რანგის სახელმწიფო მოღვაწე და თანამედროვე ქართული სახელმწიფოს ფუძემდებელი, დღეს საქართველოს მტრის პუტინის ტყვეა. პოსტ საბჭოთა სამყაროს ყველაზე გავლენიანი ლიდერის ჯანმრთელობის მდგომარეობა კრემლში შემუშავებული გეგმის მიხედვით სერიოზულად დაზიანებულია და ექიმების პროგნოზით შეიძლება ძალიან მალე ლეტალობით დასრულდეს. […]
საექსპერტო დასკვნის საფუძველზე, საქართველოს მესამე პრეზიდენტი ციხეთა სისტემაში დაექვემდებარა შეძლო წამებასა და არასათანადო მოპყრობას, ასევე არაადეკვატურ სამედიცინო მომსახურებას. ყოველივე ამის გათვალისწინებით, ექსპერტების მკაცრი რეკომენდაციაა, პაციენტ სააკაშვილის სასწრაფოდ გადაყვანა უცხოეთის კლინიკაში სადაც მას გაუწევენ კვალიფიციურ დახმარებას, ჩაუტარებენ სრულყოფილ დიაგნოსტიკას, მკურნალობას და რეაბილიტაციას.
მიუხედავად იმისა, რომ მიხეილ სააკაშვილის მდგომარეობა საგანგაშოა, მისი საკითხის განხილვა სასამართლოში დაჩქარებულად არ მიმდინარეობს და ჭიანურდება, პაციენტს კი დრო ეწურება. ყველას კარგად გვახსოვს რა მოჰყვა საქართველოს პირველი პრეზიდენტის მკვლელობას ქვეყანაში – პროგრესისა და განვითარებას დასამარება, წყვდიადი და ჭაობი და რომ არა მიხეილ სააკაშვილი, კიდევ დიდხანს მოგვიწევდა იმ გაუსაძლის ყოფაში არსებობა.
ჩვენ საქართველოს პარლამენტართა საზოგადოება მეორეჯერ ვერ მივცემთ თავს უფლებას მოგვიკლან პრეზიდენტი, შუალედური პოზიცია არ არსებობს, დუმილი კლავს, დუმილი დანაშაულია. საქართველოს ეროვნული ინტერესებიდან გამომდინარე მივმართავთ საქართველოს მეხუთე პრეზიდენტს, ქალბატონ სალომე ზურაბიშვილს, გამოიყენონ კონსტიტუციით მინიჭებული უფლება, საქართველოს მესამე პრეზიდენტის სიცოცხლის გადასარჩენად, რაც ასევე ხელს შეუწყობს ევროინტეგრაციის პროცესს, გაზრდის დემოკრატიის ხარისხს, შემცირება პოლარიზაციას”, – ნათქვამია განცხადებაში.
ცნობისთვის, იმავე მოთხოვნით რამდენიმე დღეა რეზიდენციასთან აქცია იმართება.