პრემიერმინისტრი, ირაკლი ღარიბაშვილის თქმით, მთავრობა მუშაობს ყოფილი პარლამენტის შენობისთვის კონკრეტული ფუნქციის მოძებნაზე. შენობა ქუთაისში წლებია ცარიელია. ღარიბაშვილმა თქვა, რომ მთავრობის მიზანია იქ IT მიმართულების განვითარებას შეუყონ ხელი.
“მოგეხსენებათ, რომ ქუთაისის პარლამენტის შენობა არის პრაქტიკულად უფუნქციოდ დარჩენილი, ჩვენი მიზანი არის, რომ მაქსიმალურად ხელი შევუწყოთ იქ აიტის მიმართულების განვითარებას. ვემუშავებით ერთ-ერთ ებრაულ კომპანიას, რომელიც გამოთქვამს სურვილს, რომ მოხდეს პარლამენტის შენობის ბაზაზე შეიქმნას ახალი აიტი ჰაბი, არა მხოლოდ ტექნოლოგიური, რომელიც მოიზიდავს დაასაქმებს აიტი სფეროში მომუშავე ახალგაზრდებს, ჩვენ სტუდენტებს ხელს შეუწყობს განვითარებაში”, – თქვა ირაკლი ღარიბაშვილმა.
მისივე განცხადებით, ამ მიმართულებით რამდენიმე ათეული მილიონი დოლარის ინვესტიცია განხორციელდება. ღარიბაშვილმა თქვა, რომ შესაძლოა პარტნიორი ამ კუთხით ქუთაისის ტექნოლოგიური უნივერსიტეტი იყოს.