ბრიტანეთის თავდაცვის სამინისტროს შეფასებით, ნაკლებად სავარაუდოა, რომ რუსეთმა დონეცკის, ლუგანსკის, ზაპორიჟიესა და ხერსონის ოლქებთან დაკავშირებით თავის მიზნებს მიაღწიოს და ტერიტორიებზე კონტროლი გააფართოოს.
უწყების ცნობით, დიდი ალბათობით, რუსები ვერ შეძლებენ ეფექტური დამრტყმელი ძალის შექმნას, რომელიც ამ ტერიტორიის აღებას შეძლებს.
“2022 წლის 8 დეკემბერს კრემლის პრესსპიკერმა დიმიტრი პესკოვმა ხელახლა ჩამოაყალიბა “სპეციალური სამხედრო ოპერაციის” ძირითადი მიზნები. მისი თქმით, რუსეთის ერთ-ერთი მთავარი მიზანი დონბასისა და სამხრეთ-აღმოსავლეთ უკრაინის მაცხოვრებლების “დაცვა” იყო, თუმცა ის ამტკიცებდა, რომ ამ ტერიტორიების “გათავისუფლებისთვის” ჯერ კიდევ ბევრია გასაკეთებელი.
პესკოვის განცხადებები მიუთითებს იმაზე, რომ რუსეთის ამჟამინდელი ომის მინიმალური პოლიტიკური მიზნები უცვლელია. რუსეთი, სავარაუდოდ, კვლავ აპირებს კონტროლის გაფართოებას დონეცკის, ლუგანსკის, ზაპოროჟიესა და ხერსონის ოლქებზე. რუსი სამხედრო დამგეგმავები, სავარაუდოდ, კვლავ მიზნად ისახავენ დონეცკის ოლქში უფრო ღრმად წინსვლას. თუმცა ამჟამად, ნაკლებად სავარაუდოა, რომ რუსეთმა მიაღწიოს თავის მიზნებს: დიდი ალბათობით, რუსები ვერ შეძლებენ ეფექტური დამრტყმელი ძალის შექმნას, რომელსაც შეუძლია ამ ტერიტორიების აღება. ასევე, ნაკლებად სავარაუდოა, რომ რუსეთის სახმელეთო ძალებმა, მომდევნო რამდენიმე თვის განმავლობაში, ოპერატიულად მნიშვნელოვან წინსვლას მიაღწიონ”, – წერია ანგარიშში.