“სალომე ზურაბიშვილი ისეთ განცხადებებს აკეთებს, მისგან არაფერს გამოვრიცხავ” – ასე უპასუხა “ქართული ოცნების” ლიდერმა, მამუკა მდინარაძემ ჟურნალისტის კითხვას პრეზიდენტის მხრიდან მიხეილ სააკაშვილის შესაძლო შეწყალებასთან დაკავშირებით.

მდინარაძის თქმით, სალომე ზურაბიშვილი “ნაციონალური მოძრაობის ნარატივზეა დამჯდარი”.

“არ ვიცი, სალომე ზურაბიშვილი რას გააკეთებს ნამდვილად არ ვიცი. ისეთ განცხადებებს აკეთებს მისგან არაფერს გამოვრიცხავ. ვაგონებით ჩამოჰყავთ რუსები საქართველოშიო რომ იძახა – იმდენად ჩაჯდა ნაცმოძრაობის ნარატივში, ხომ დაგეგმეს იმათმა, მიუხედავად იმისა, რომ იციან, ეთნიკურად ქართველია ძალიან დიდი უმრავლესობა რუსეთის მოქალაქეებისა, ვინც დარჩა საქართველოში ამ პერიოდში, ეს იციან და მაინც რუსები შემოდიანო. კი ბატონო, რუსიც ბევრია, უკრაინელიც, რუსულ ენოვანი ადამიანები ჩანან უფრო მეტნი ქუჩაში, მაგრამ ისიც ძალიან კარგად იციან, რომ ვინც დარჩა და ვინც უკან არ ბრუნდება, ის ადამიანები არიან საქართველოში რომ ოჯახები ჰყავთ, ეთნიკურად სომეხი, აზერბაიჯანელი და დიდი ნაწილი ქართველი – სამწუხაროდ, ამ ნარატივზე დაჯდა პრეზიდენტი და იძახა, რომ ვაგონებით ჩამოჰყავთ რუსეთიდან ხალხი, რა ვაგონი? როდის ნახა ბოლოს ვაგონი? და ამ განცხადების ავტორი რა ვიცი, რას გააკეთებს, რა გითხრათ”, – თქვა მამუკა მდინარაძემ

მიხეილ სააკაშვილის ჯანმრთელობის მძიმე მდგომარეობაზე ზურაბიშვილი საქმის კურსშია. მას ინფორმაცია სახალხო დამცველმა მიაწოდა.