რუსთავი 2-ის მაუწყებლობა დაახლოებით 20 წუთის განმავლობაში გაითიშა გუშინ საღამოს საკაბელო არხებზე. როგორც მოგვიანებით გაირკვა, მიზეზი კომპანია სტერეო +-ის ციფრული მაუწყებლობის ქსელში შექმნილი ტექნიკური პრობლემა იყო. ამის გამო გაითიშა ის საკაბელოებიც, რომლებსაც აღებული აქვთ სიგნალი ეთერიდან, თბილისსა და რეგიონებში. მაუწყებლობა რამდენიმე წუთში განახლდა, მაგრამ არასრულფასოვნად. ამასთან, მომხმარებლები სოციალურ ქსელში წერდნენ, რომ რუსთავი 2 -ის ნაცვლად GDS ჩაირთო. სამაუწყებლო კომპანია რუსთავი 2 ურჩევს მაყურებლებს გადატვირთონ სეტბოქსები და თავიდან მოძებნონ არხები. რის შემდეგაც უნდა გამოსწორდეს პრობლემა, წინააღმდეგ შემთხვევაში ისევ სტეროს +-ს ან იმ საკაბელოებს დაუკავშირდნენ, ვისგანაც იღებენ მაუწყებლობას.
აღნიშნულთან დაკავშირებით სტერეო+ განცხადება გაავრცელა, სადაც ნათქვამია, რომ სატელევიზიო არხების გათიშვა წმინდა ტექნიკური ხასიათის ხარვეზი იყო. ამასთან "სტერეო+"-ის განცხადებაში წერია, რომ, გუშინ, 20:22 საათზე, 2014 წლის 25 დეკემბრის შემდეგ პირველად, მოხდა "სტერეო+"-ის სათავო სადგურის ძირითადი სერვერის ავარიული ტექნიკური გათიშვა, რომლის ფუნქციონირებაც თავის თავზე სარეზერვო სერვერმა აიღო. "მომხდარი ტექნიკური შეფერხების გამო, მოხდა სატელევიზიო არხების გათიშვა. გადატვირთვის დრომ შეადგინა 76 წამი, რის შემდგომაც სისტემის ფუნქციონირება აღდგა. ამ მოვლენამ გამოიწვია სხვადასხვა ტიპის მიმღებ მოწყობილობებში განსხვავებული ეფექტი დროის სხვადასხვა ხანგრძლივობით. ეს იყო წმინდა ტექნიკური ხასიათის ხარვეზი. მსგავსი მოვლენის შემთხვევაში ეფექტის დროის შესამცირებლად სასურველია მიმღები მოწყობილობის ოპერატიული გადატვირთვა. კომპანია წუხს მაყურებლისთვის შექმნილი დისკომფორტისთვის", – ნათქვამია "სტერეო+"-ის განცხადებაში.