ქართული ოცნების თავმჯდომარე, ირაკლი კობახიძე მიიჩნევს, რომ ბუჩაში პარლამენტის სპიკერი, შალვა პაპუაშვილის მიწვევა “არარელევანტურია”. როგორც კობახიძე განმარტავს, უკრაინის ხელისუფლების მხრიდან “შეურაცხმყოფელი განცხადებები” ისმის.
“პარლამენტის თავმჯდომარემ უკვე გამოხატა თავისი პოზიცია ამ საკითხთან დაკავშირებით, არის სამწუხარო რეალობა, როდესაც ვისმენთ სამწუხაროდ სახელმწიფოს მიმართ შეურაცხმყოფელ განცხადებებს უკრაინის ხელისუფლების მხრიდან, რასაც აქვს თავისი მიზეზი, აქ დეტალებში აღარ შევალ. ამ ფონზე ასეთი მოწვევის გამოგზავნა არის არარელევანტური., ჩვენ გვაქვს ძალიან დიდი იმედი, რომ უკრაინის ხელისუფლება გათავისუფლდება იმ ადამიანებისგან, რომლებიც პრაქტიკულად უზრუნველყოფს იმას, რომ უკრაინის ხელისუფლების მხრიდან ჩვენი სახელმწიფოს მიმართ იდგმება არასწორი ნაბიჯები”, – ამბობს კობახიძე, რომელმაც 9 აპრილის ტრაგედიის დროს დაღუპულებს მემორიალთან პატივი მიაგო.
უკრაინის ქალაქ ბუჩაში მომხდარი ტრაგედიის საკუთარი თვალით სანახავად სხვადასხვა ქვეყნის პარლამენტარები მიიწვიეს. როგორც უკრაინის საელჩოში განაცხადეს, მიწვევა გაუგზავნეს საქართველოს პარლამენტის თავმჯდომარესაც. შალვა პაპუაშვილს კი უკრაინის მხრიდან სხვადასხვა საკითხის “განუმარტებლობის ფონზე” ოფიციალური მიწვევა არასათანადოდ მიაჩნია.