ქვეყნის სხვადასხვა რაიონში ნაციონალური მოძრაობის პარტიის ოფისები თითქმის ერთდროულად დაარბიეს. თბილისში, ქუთაისში, ბათუმში, გორში, ახალციხეში და სხვა ქალაქებში დაზიანებულია 20-მდე ოფისი. აქციების მონაწილეებმა შენობები საღებავებით დასვარეს და ოფისების გარე ფასადებზე უხამსი წარწერები დატოვეს
ზუგდიდის რაიონული ოფისების შენობაში ნიღბიანი პირები შეიჭრნენ. ნაციონალური მოძრაობის წევრების ინფორმაციით, თავდამსხმელთა შორის გუბერნიის, ზუგდიდის მერიისა და გამგეობის თანამშრომლები იყვნენ.
ოპოზიციის ოფისებზე თავდასხმა სამეგრელოს რეგიონის სხვა რაიონებშიც მოხდა.
გუშინ ღამით თავდასხმა მოხდა თბილისშიც. თავდამსხმელებმა სააკაშვილის საპრეზიდენტო ბიბლიოთეკის ფასადი შეღებეს.
ოპოზიციის წევრები პასუხისმგებლობას ქართულ ოცნებას აკისრებენ და აცხადებენ, რომ ხელისუფლება ამ თავდასხმებით პრობლემების გადაფარვას ცდილობს.
საპარლამენტო უმცირესობის ოფისების დარბევის ფაქტებსა და პრემიერის განცხადებას არასამთავრობო ორგანიზაციები ეხმაურებიან. ისინი დღეს ერთობლივი განცხადების გავრცელებას გეგმავენ, სადაც საუბარი იქნება იმ რისკებზე რაც არსებული დაპირისპირების ფონზე შეიძლება წარმოიშვას.
„პროცესები, ძალადობრივი ქმედებები ორგანიზებულია და პარტიულ ხასიათს ატარებს,“-განაცხადა ნინო ლომჯარიამ.
სამოქალაქო სექტორი გმობს ძალადობას და მოუწოდებს ხელისუფლებას დაუყოვნებლივი ქმედებების განხორციელებისკენ და ასევე მოუწოდებენ ხელისუფლებას თავი შეიკავონ ისეთი განცხადებების გაკეთებისგან, რომელიც ძალადობას წაახალისებს.
შეგახსენებთ, პრემიერის განცხადება ამ პროცესებთან დაკავშირებით ძალადობის წახალისებად იქნა კვალიფიცირებული როგორც ოპოზიციისა და ფართო საზოგადოების, ისე საქართველოს პრეზიდენტის მიერ.