ზუგდიდის დადიანების მუზეუმის ეზოში შიდსით გარდაცვლილთა საერთაშორისო დღე აღნიშნეს. საქართველოში დაავადების შედეგად გარდაცვლილ 1012 ადამიანს პატივი ანთებული სანთლებით მიაგეს, რომელთა ქვეშ ფურცლებზე იმ ადამიანების სახელები იყო მიწერილი, რომლებიც შიდსისგან დაიღუპნენ. ღონისძიება ასოციაცია ქსენონის და ზუგდიდის მერიის ტექნიკური მხარდაჭერით გაიმართა. შიდსით გარდაცვლილთა ხსოვნის საერთაშორისო დღე 1983 წლიდან აღინიშნება და ის მაისის მესამე კვირას იმართება. 30 წელზე მეტია მსოფლიო შიდსით გარდაცვლილთა ხსოვნის დღეს სანთლების ანთების ტრადიცია აერთიანებს ადამიანებს მსოფლიოს ყველა ქვეყნიდან. ამ დღეს მოსახლეობა იკრიბება შიდსით გარდაცვლილთათვის პატივის მისაგებად, აივ ინფიცირებულთა მხარდასაჭერად და იმის სადემონსტრაციოდ, თუ რამდენად მნიშვნელოვანია სამოქალაქო საზოგადოების როლი აივ ინფექციის მკურნალობის, პრევენციის, ზრუნვისა და მხარდაჭერის საქმეში.