აშშ ტელეკომპანია „რუსთავი-2-ის“ გარშემო მიმდინარე პროცესებს ყურადღებით აკვირდება, — განუცხადა აშშ-ის სახელმწიფო დეპარტამენტის ოფიციალურმა წარმომადგენელმა მარკ ტონერმა “რუსთავი-2-ის” ჟურნალისტს, დავით ნიკურაძეს სათანადო კითხვის პასუხად.

„ამ მოვლენებს ყურადღებით ვაკვირდებით. გამოვდივართ მოწოდებით, რომ ნებისმიერი სამართლებრივი პროცესი, რომელიც მედიას უკავშირდება, ყველგან და, რა თქმა უნდა, საქართველოში, მართლმსაჯულების უმაღლესი სტანდარტების დაცვითა და გამოხატვის თავისუფლების პატივისცემით წარიმართოს“, — აღნიშნა მარკ ტონერმა.

მისივე თქმით, ბოლო რამდენიმე წლის განმავლობაში აშშ-ის ხელისუფლება და საერთაშორისო საზოგადოება დადებითად აფასებდა საქართველოს თავისუფალ და პლურალისტულ მედიაგარემოს, რომელიც საერთაშორისოდ და მთელი რეგიონისთვის სამაგალითოდ არის აღიარებული.

„ამგვარად, ქმედებები, რომელიც ისე ჩანს, თითქოს ზღუდავს ამ გარემოს, მედიის თავისუფლებას ან მედიაპლურალიზმს, გულწრფელად გითხრათ, შემაშფოთებელია, განსაკუთრებით საპარლამენტო არჩევნების წინ. ამას სერიოზულად ვეკიდებით და ვაკვირდებით“, – განაცხადა მარკ ტონერმა.